اداکار شفیع محمد کو دنیا سے رخصت ہوئے 16 برس بیت گئے

لاہور: معروف اداکار شفیع محمد شاہ کو دنیا سے رخصت ہوئے 16 برس بیت گئے، اداکار نے اپنے منفرد انداز سے ڈرامہ انڈسٹری میں مقام بنایا۔

اداکاری کے تمام رموز سے مکمل واقفیت رکھنے والے شفیع محمد شاہ 1949ء میں اندرون سندھ کے شہر کنڈیارو میں پیدا ہوئے، اداکار نے حیدر آباد ریڈیو سے صدا کاری کے ذریعے اپنے فنی سفر کی شروعات کی، انہوں نے ٹیلی ویژن سکرین پر کریئر کا آغاز ڈرامہ سیریل اڑتا آسمان سے کیا، شفیع محمد کا ڈرامہ سیریل تیسرا کنارہ ان کی شہرت کی وجہ بنا۔

اداکار شفیع محمد کے معروف ڈراموں میں چاند گرہن، دائرے، دیواریں، جنگل، بند گلاب، کالی دھوپ، ماروی اور تپش شامل ہیں، فلمی کریئر کے دوران شفیع محمد نے فلم ایسا بھی ہوتا ہے، تلاش، مسکراہٹ اور دیگر میں بھی کام کیا۔

اداکار کی صلاحیتوں کے اعتراف میں انہیں 1991ء میں صدارتی تمغہ برائے حسن کارکردگی سے نوازا گیا، شفیع محمد 17 نومبر 2007ء کو دنیائے فانی سے رخصت ہوئے ان کے انتقال کے دو ماہ بعد انہیں ستارہ امتیاز سے بھی نوازا گیا۔