فرانس کی مغربی کنارے میں اسرائیلی آباد کاروں کے تشدد کی مذمت

فرانس نے مغربی کنارے میں اسرائیلی آباد کاروں کی طرف سے کی جانے والی تشدد کی کارروائیوں کی مذمت کرتے ہوئے انہیں دہشت گردی کی پالیسی قرار دے دیا ہے۔

غیر ملکی خبر رساں ایجنسی کے مطابق فرانس نے کہا ان کارروائیوں کا مقصد فلسطینیوں کو بے گھر کرنا ہے۔ فرانس نے اسرائیلی حکومت سے کہا کہ فلسطینیوں کو یہودی آباد کاروں کے تشدد سے بچایا جائے۔

وزارت خارجہ کی ترجمان این کلیئر لیجینڈرے نے یہ بھی کہا کہ فرانس کی طرف سے غزہ کے لیے بھیجی گئی 100 ٹن امداد میں سے تقریباً نصف غزہ کی پٹی میں پہنچ چکی ہے۔

انہوں نے کہا اسرائیل کو یہ فیصلہ کرنے کا حق نہیں ہے کہ مستقبل میں غزہ پر کون حکومت کرے گا۔ پٹی کو مستقبل کی فلسطینی ریاست کا حصہ ہونا چاہیے۔

دریں اثنا فرانسیسی وزیر خارجہ کیتھرین کولونا نے جمعرات کو اعلان کیا کہ انہوں نے اپنے ایرانی ہم منصب حسین امیر عبداللہیان کو فلسطین اسرائیل تنازع کو لبنان تک توسیع دینے سے خبردار کیا ہے۔