جنگ کے بعد حماس غزہ پر حکومت نہیں کرسکتی،یورپی کمیشن

اسرائیل اور حماس کے درمیان عارضی جنگ بندی کے خاتمے کے بعد غزہ کی پٹی پر جنگ دوبارہ شروع کرنے کے حوالے سے جہاں اسرائیلی موقف بدستور برقرار ہے، وہیں یورپی کمیشن کی صدر ارسولا وان ڈیر لیین نے اس معاملے پر اپنے موقف کو دہرایا ہے۔

یوریی پونین کی صدر کاکہنا تھا کہ حماس کے غزہ واپس آنے یا اس کے لیے غزہ کی پٹی کے انتظام کی ذمہ دار اتھارٹی کا حصہ بننے کا قطعاً کوئی امکان نہیں ہے، غزہ فلسطینی ریاست کی سرزمین کا حصہ ہے، اس لیے فلسطینی اتھارٹی کو اکیلے ہی اس کا نظم و نسق چلانا چاہیے۔

انہوں نے کہا کہ فلسطینیوں اور اسرائیلیوں کے پاس زندگی بھر کا موقع ہے کہ وہ اپنے درمیان طویل تنازع کا سیاسی حل تلاش کریں۔ دو ریاستی حل کا جنگ سے پہلے کے مقابلے میں اب زیادہ امکان نظر آتا ہے۔

انہوں نے کہا کہ "اب وقت آ گیا ہے کہ بالآخر کچھ معاملات پر بات چیت کی جائے اور 1967ء کی سرحدوں اور مشرقی یروشلم کے معاملات طے کیے جائیں۔

یاد رہے کہ اس سے قبل امریکا اور اسرائیل بھی فلسطین کے دوریاستی حل اور غزہ میں جنگ کے بعد حماس کی حکومت قائم ہونے نہ دینے کا عندیہ دے چکے ہیں۔

جس پر حماس نے کہا تھا کہ عوام غزہ میں کسی مسلط شدہ حکومت کو قبول نہیں کریں گے۔ غزہ میں حکومت اسی کی ہوگی جسے فلسطینی عوام چاہے گی۔