رجب طیب اردوان نے اسرائیل کے وزیر اعظم نیتن یاہو کو غزہ کا قصاب قرار دے دیا

ترکیہ کے صدر رجب طیب اردوان نے اسرائیل کے وزیر اعظم نیتن یاہو کو غزہ کے قصاب کا لقب دیا ہے، وہ پچھلے ڈیڑھ ماہ کے دوران غزہ میں اسرائیلی بمباری اور ٹینک حملوں کے نتیجے میں ہونے والی چھ ہزار بچوں سمیت پندرہ ہزار سے زائد فلسطینیوں کی ہلاکتوں کا ذکر کر رہے تھے۔

غیر ملکی خبر رساں ایجنسی کے مطابق ایک تقریب میں خطاب کرتے ہوئے طیب اردوان نے نیتن یاہو کو یہود مخالفت کا سب سے بڑا سبب بھی قرار دیا۔ اسرائیل کی طرف سے حماس کے سات اکتوبر کے حملے جواب میں وسیع پیمانے پر کی گئی ہلاکتوں اور تباہی پر صدر اردوان نے بار بار تنقید کی اور اسرائیل کوایک دہشت گرد ریاست کا نام دیا۔ جبکہ ترکیہ کے صدر نے حماس کو آزادی پسند گروپ کا نام دیا۔ 

ترکیہ کے صدر نے یاہو کو صرف فلسطینیوں کا قاتل نہیں قرار دیا بلکہ دنیا بھر میں یہودیوں کا بھی دشمن کہا ، کیونکہ اردوان کے بقول وہ فلسطینیوں کو قتل کر کے یہودیوں کے لیے بھی دشمنی کا ذریعہ بن رہے ہیں۔ کیونکہ یہودیوں کے لیے خطرہ اس کی وجہ سے بڑھ رہا ہے۔

اردوان نے اسرائیل اور اس کے فلسطینیوں کے خلاف بد ترین بمباری کے ذمہ دار رہنماؤں کے خلاف تیز زبان استعمال کر کے اسرائیل کےساتھ سفارتی تعلقات منقطع کرنے کی بھی دھمکی دی ہے۔ دونوں ملکوں کے درمیان ایک دہائی کے بعد سفارتی تعلقات بحال ہوئے تھے۔

غزہ کی جاری جنگ کے دوران ہی اسرائیل نے ترکیہ سے اپنے سفارت کاروں کو واپس بلایا ہے۔ ترکیہ نے بھی تل ابیب سے اپنے سفارت کاروں کو واپس بلا لیا ہے۔

اردوان نے کہا' حماس کے خاتمے کے لیے نیتن یاہو کی انتظامیہ کے بیانات اس معاملے کو پیچیدہ بنا رہے ہیں جو جنگ بندی کے لیے ثالث ملک کوشش کر رہے ہیں۔ اس کے نتیجے میں امید متاثر ہو رہی ہے۔