وزیر اعظم کے معاون خصوصی ذلفی بخاری کا مستعفی ہونے کا اعلان

سماجی رابطے کی ویب سائٹ ٹوئٹر پر ایک پیغام میں وزیراعظم کے معاون خصوصی برائے سمندر پار پاکستانیز ذلفی بخاری نے کہا کہ  میں پاکستان میں ہی موجود ہوں اور وزیراعظم کے وژن کے ساتھ کھڑاہوں، میں اپنے اوپرلگنے والے الزامات پرانکوائری کا سامنا کرنے کے لئے تیارہوں۔

3/3
I’m here to stay in Pakistan and stand united with the Prime Minister and his vision. I sacrificed my life overseas to come and serve my country, I am ready to face any inquiry.

— Sayed Z Bukhari (@sayedzbukhari) May 17, 2021

ذلفی بخاری  نے کہا کہ  میرا رنگ روڈ منصوبے اور رئیل اسٹیٹ پراجیکٹ سے کوئی تعلق نہیں ہے۔ شفاف تحقیقات کے لئے اپنے عہدے سے الگ ہورہا ہوں، رنگ روڈ منصوبے پرالزامات کی جوڈیشل انکوائری کرائی جائے۔

اس سے قبل چئیرمین نیب جاویداقبال نے رنگ روڈ راولپنڈی منصوبہ میں مبینہ طور پر اربوں روپے کی بد عنوانی،بےضابطگیوں اور غیر قانونی لینڈ ایکوزیشن کا نوٹس لیتے ہوئے نیب راولپنڈی کو تحقیقات کا حکم دیدیا ہے۔

چیئر مین نیب نے ہدایت کی ہے کہ  رنگ روڈ منصوبہ کی تحقیقات بلا امتیاز اور شفافانداز میں کی جا ئیں اور منصوبہ کے تمام پہلوؤں کو مد نظر رکھتے ہوئے ذمہداران کا تعین کا جائے ۔

 چئیرمین نیب نے کہا ہے کہ نیب احتساب سب کے لئے کی پالیسی پر سختی سےقائم ہے۔ انہوں نے کہا کہ نیب کے پاس بد عنوان عناصر کے خلاف اربوں روپے کی کرپشن کے ٹھوس شواہد موجود ہیں۔

چئیرمین نیب نے کہاکہ نیب کا تعلق کسی پارٹی،گروپاور فرد سے نہیں بلکہ صرف اور صرف ریاست پاکستان سے ہے۔نیب بد عنوان عناصر کوقانون کے مطابق منطقی انجام تک پہنچانے کے لئے پر عزم ہے۔

یاد رہے کہ حکومتی تحقیقات میں یہ الزام لگایا گیا تھا کہ راولپنڈی میں رنگ روڈ منصوبے کی ترتیب (لے آؤٹ) کو تبدیل کرکے کچھ ہاؤسنگ سوسائٹیوں کو فائدہ ہوا ہے۔

فیکٹ فائنڈنگ رپورٹ کے مطابق ، راولپنڈی کے سابق کمشنر کیپٹن (ر) محمد محمود اور لینڈ ایکوزیشن کے معطل کمشنر وسیم تابش نے اراضی کے حصول کے لئے 2.3 ارب روپے ادا کیے اور اس علاقے کے ایک معروف خاندان  کو فائدہ پہنچایا۔