گھریلو تشدد کی شکار رضوانہ صحت یاب، ڈسچارج کے بعد چائلڈ پروٹیکشن بیورو کے حوالے کر دیا گیا

گھریلو تشدد کی شکار بچی رضوانہ کو 4 ماہ سے زائد عرصے کے بعد صحت یاب، جنرل اسپتال لاہور سے ڈسچارج کرکے چائلڈ پروٹیکشن بیورو کے حوالے کردیا گیا۔

رضوانہ نے میڈیا سے بات چیت کرتے ہوئے کہا کہ میں آج بہت خوش ہوں، میں ٹھیک ہوگئی ہوں۔ اسپتال میں میرا بہت خیال رکھا گیا۔  میں یہاں سے بچوں کے ادارے میں جارہی ہوں۔

رضوانہ کو جنرل اسپتال سے ڈسچارج کرکے چائلڈ پروٹیکشن بیورو کی چیئرپرسن سارہ احمد کے سپرد کیا جو رضوانہ کو لینے خود اسپتال پہنچی تھیں۔

واضح رہے کہ سول جج کی اہلیہ کے ْشدید تشدد کا نشانہ بننے والی رضوانہ کو سر،چہرے ، کمر پرشدید زخم آئے تھے۔ اسپتال میں اس کی مختلف سرجریز اور ڈرفٹنگ بھی کی گئی۔

نگراں وزیر صحت پنجاب جاوید اکرم کا اس موقع پر کہنا تھا کہ رضوانہ چندماہ پہلےآئی تھی تومیڈیا نےبہت سپورٹ کیا۔ میڈیکل ٹیم کا شکریہ جنہوں نے رضوانہ کاخیال رکھا۔ وہ نرس یا ڈاکٹر بننا چاہے تو ان کو پوری سپورٹ ملے گی۔

چائلڈ پروٹیکشن کی چیئرپرسن سارہ احمد نے کہا ہے کہ رضوانہ کے لیے بیوٹیشن اور شیف کا کورس ڈیزائن کر لیا گیا ہے۔ رضوانہ کا ہر طرح سے خیا رکھا جائے گا۔