معروف نعت خواں جنید جمشید کو اپنے مداحوں سے بچھڑے7 برس بیت گئے

دل دل پاکستان سے شہرت کی بلندیوں کا سفر کرنے والے جنید جمشید کو دنیا سے گئے 7 برس بیت گئے.

جنید جمشید جنہوں نے دل دل پاکستان جیسا ملی نغمہ گا کر راتوں رات شہرت حاصل کی کئی سال تک پاپ سنگنگ سے وابستہ رہ کر نام کماتے رہے لیکن پھر شوبز کی دنیا ترک کرکے مذہب کو اپنا اوڑھنا بچھونا بنا لیا اور لوگوں کے دلوں میں اپنی قدر وقیمت میں اضافہ کیا۔

جنید جمشید7 دسمبر کو قومی ایئر لائن پی کے 661 کی پرواز پر چترال سے اسلام آباد آتے ہوئے ایک فضائی حادثے میں جاں بحق ہوئے ان کے ساتھ اہلیہ سمیت 45 دیگر مسافر بھی لقمہ اجل بن گئے۔وہ زندگی میں ایک بڑی اور مثبت تبدیلی سے نوجوانوں کیلیے رول ماڈل بنے۔

جنید جمشید نے اپنی زندگی کا بھرپور عروج دیکھا۔ وہ 3 ستمبر 1964 کو کراچی میں پیدا ہوئے۔ والد کا تعلق پاکستان ائیر فورس سے تھا اسی لیے ان کی خواہش تھی کہ بیٹا بھی اسی شعبے سے وابستہ ہو لیکن انہوں نے اپنے کیریئر کا آغاز سنگنگ سے کیا۔

جنید جمشید یونیورسٹی دور میں میوزک سے لگاؤ ہونے کے بعد دوستوں کے ساتھ مل کر ایک بینڈ تشکیل دیا۔ جس نے 1983 میں پشاور اور پھر اسلام آباد یونیورسٹی میں اپنی فن کا مظاہرہ کیا۔ بعد ازاں اس چھوٹے سے بینڈ وائٹل سائنس نے دنیا بھر میں نام روشن کیا اور دل دل پاکستان جیسے مشہور قومی نغموں کو تخلیق کیا۔

اپنے گلوکاری کے کیریئر کی بلندی پر پہنچنے کے بعد اللہ تعالیٰ نے انہیں دین کی راہ دکھادی جس کے بعد انہوں نے موسیقی کو خیرباد کہا اور اللہ والوں سے ناطہ جوڑ لیا۔ جب انہوں نے دین کی سربلندی کا علم اٹھایا تو کسی مشکل کی پروا نہ کی۔ تبلیغی جماعت سے وابستگی کے بعد جنید جمشید دین کی تبلیغ کے لیے دیس دیس گئے۔