اسرائیل کی لبنان پر بھی گولہ باری ،امریکہ کا غزہ میں جنگ بندی کا مطالبہ

 تفصیلات کے مطابق غزہ پر حملوں کے معاملے پر جنگ بندی کے لئے سفارتی کوششیں بھی  تیز ہوگئیں ، واشنگٹن ڈی سی میں  امریکی صدر جو بائیڈن نے اسرائیلی  وزیر اعظم بینجمن نیتن یاہو کے ساتھ تیسری فون  کال پر گفتگو کی اور جنگ بندی کی حمایت کا اظہار کیا ، بائیڈن نے اسرائیل سےبے گناہ شہریوں کے تحفظ کو یقینی بنانے کے لئے ہر ممکن کوشش کرنے کامطالبہ کیا۔وائٹ ہاؤس سے جاری بیان میں کہا گیا ہے کہ امریکا، اسرائیل اور فلسطین کے درمیان جنگ بندی کی حمایت کرتا ہے۔

دوسری جانب اسرائیل کی جانب سے غزہ پر رات گئے شدید بمباری کی گئی، خلیجی میڈیا کے مطابق غزہ پٹی میں 20 منٹ میں 40 فضائی حملے کیے گئے ہیں۔ اسرائیلی طیاروں نے غزہ سٹی میں سرکاری عمارت کو بھی نشانہ بنایا،اسرائیلی طیاروں نے غزہ سٹی کےشمالی علاقوں میں بھی بمباری کی۔ فلسطینی گروپوں نے اسرائیلی شہروں کی طرف راکٹ فائر کیے ، اسرائیلی فوج کی جانب سے چھ ناکام راکٹ  حملوں  کے جواب میں لبنان پر بھی گولہ باری کی گئی ۔

فلسطینی وزیر صحت  کے مطابق اسرائیلی فوج کے فلسطینی علاقوں پر حملوں میں سات ہزار سے زیادہ افراد زخمی ہوچکے ہیں،  مستقل جاری فضائی حملوں میں دو سو زائد فلسطینی شہید ہو چکے ہیں جن میں بڑی تعداد میں معصوم بچوں کی ہے، فلسطینی وزیرصحت   کاکہنا ہے کہ غزہ کی پٹی میں اسرائیل کے فضائی حملوں میں شہید ہونے والے افراد میں ایک تہائی بچّے ہیں۔

اقوام متحدہ کی جنرل اسمبلی کے صدر نے الجیریا کے مستقل نمائندے کی درخواست پر فلسطین میں جاری اسرائیلی جارحیت کے معاملے پر 20 مئی کو اجلاس طلب کرلیا۔