پاکستان کرکٹ ٹیم کے لیگ اسپنر ابرار احمد انجری کا شکار

پاکستان کرکٹ ٹیم کے لیگ اسپنر ابرار احمد انجری کا شکار ہو گئے،انہوں نے اپنے دائیں پیر میں تکلیف کی شکایت کی ہے۔

پی سی بی کے مطابق انہیں یہ تکلیف پرائم منسٹر الیون کے خلاف چار روزہ میچ کے تیسرے دن8اوورز کرانے کے بعد ہوئی جس کے سبب انہیں میدان سے باہر آنا پڑا۔ پی سی بی کے مطابق 25 سالہ ابرار احمد کو ایم آر آئی سکین کے لیے ہسپتال بھیجا گیا ہے۔

ابرار احمد نے پرائم منسٹر الیون کے خلاف اب تک 27 اوورز کیے ہیں اور ایک وکٹ حاصل کی ہے۔ یہ چار روزہ میچ ٹیسٹ سیریز کی تیاری کا حصہ ہے ۔ پاکستان اور آسٹریلیا کے درمیان تین میچوں کی ٹیسٹ سیریز 14 دسمبر سے 7 جنوری تک کھیلی جائے گی۔