ڈیمز عملدرآمد کمیٹی کا اجلاس، مہمنداوردیامر بھاشا ڈیمزپر پیش رفت کا جائزہ لیا گیا

اسلام آباد: واپڈا کے چیئرمین انجینئر لیفٹیننٹ جنرل (ر) سجاد غنی کی زیرصدارت سپریم کورٹ آف پاکستان کے حکم پر تشکیل دی گئی عملدرآمد کمیٹی برائے دیامر بھاشا اور مہمند ڈیمزکمیٹی کااجلاس سیکرٹریٹ میں منعقد ہوا جس میں دونوں پراجیکٹس پر پیش رفت کا جائزہ لیا گیا۔

اجلاس میں چیف سیکرٹری گلگت بلتستان، ایڈیشنل سیکرٹری (بجٹ) فنانس ڈویژن اور سیکرٹری/سینئر ممبر بورڈ آف ریونیو خیبر پختونخوا نے زوم کے ذریعے شرکت کی۔

ایڈیشنل چیف سیکرٹری (ڈویلپمنٹ) خیبرپختونخوا، جوائنٹ سیکرٹری پرائم منسٹرآفس،سیکرٹری ڈیمز عملدرآمد کمیٹی/ جوائنٹ سیکرٹری منسٹری آف واٹر ریسورسز، نمائندہ چیف واٹر پلاننگ ڈویلپمنٹ اینڈ ریفارمز ڈویژن، رجسٹرار سپریم کورٹ اور دیگر سنیئر آفیسرز بھی اس موقع پر شریک تھے۔ اجلاس سے خطاب کرتے ہوئے واپڈا اور ڈیمز عملدرآمد کمیٹی کے چیئرمین سجاد غنی نے دیامر بھاشا اور مہمند ڈیمز کی بروقت تکمیل کے لئے عملدرآمد کمیٹی اور اس کی ذیلی کمیٹیوں کی کامیابیوں پر اطمینان کا اظہار کیا۔

چیئرمین نے کہا کہ ڈیمز کمیٹی دونوں اہم منصوبوں کی تعمیر کے لئے بھرپور کردار ادا کر رہی ہے۔ انہوں نے شرکا کا شکریہ ادا کیا اور امید ظاہر کی کہ دونوں منصوبوں کی تعمیر اور ان کو درپیش امور کو حل کرنے کے لیے عملدرآمد کمیٹی کا فورم موثر کردار ادا کر سکتا ہے۔بعد ازاں ممبر(فنانس) واپڈا نے اجلاس کو دونوں پراجیکٹس کے مالی امور کے متعلق آگاہ کیا۔