کتوں سے پھیلنے والے نئے کورونا وائرس کا انکشاف

غیر ملکی جریدے میں  شائع ہونے والی تحقیق کے مطابق کتوں سے پھیلنے والے نئے کورونا وائرس کا انکشاف کیا گیا ہے۔

ملائیشیا کے صوبے  ساراواک کے ایک  اسپتال سے نمونیا کے 301 مریضوں کے نمونے حاصل کیے گئے ہیں ، جن میں سے 8  نمونوں میں کینائن کورونا وائرس پایا گیا ہے۔

تحقیق کے مطابق  کینائن کورونا وائرس جن میں پایا گیا  ان میں سے اکثریت پانچ سال سے کم عمر بچوں کی تھی۔اس وائرس میں ایسی جینیاتی صلاحیت پائی جاتی ہے جس سے وائرس کے ساخت تبدیل ہوجاتی ہے۔ اس سے قبل سامنے آنے والے کینائن وائرسوں میں  یہ صلاحیت سامنے نہیں آئی تھی۔

وائرس کی   یہ قسم  2017 اور 2018 میں اسپتال میں زیر علاج نمونیا کے مریضوں میں سامنے آئی تھی اگر   اس نئی قسم کی تصدیق ہوجاتی ہے تو یہ کورونا وباء کی آٹھویں قسم ہوگی۔

کینائن کورونا وائرس  کے بارے میں  ماہرین کا کہنا ہے کہ یہ کورونا وائرس انسانوں کے لیے خطرناک ہو سکتا ہے۔اس وقت تک  کورونا وائرس کی7  ایسی اقسام سامنے آ چکی ہیں جو انسانوں کو بیمار کرسکتی ہیں۔ جن میں  سے چار صرف  بخار اور زکام کی وجہ بنتی ہیں جبکہ تین اقسام جان لیوا ہو سکتی ہیں جن میں سارس، مرس اورکووڈ 19 شامل ہیں۔