سعودی عرب سے تعلقات مضبوط ہو رہے ہیں ،انوار الحق کاکڑ

نگران وزیراعظم انوارالحق کاکڑ نے کہا ہے کہ پاکستان اور سعودی عرب کے درمیان دیرینہ برادرانہ تعلقات ہرگزرتے دن کے ساتھ مضبوط ہورہے ہیں ۔

 جمعرات کے روز اسلام آباد میں سعودی عرب کے الجمیہ  گروپ کے سربراہ شیخ عبدالعزیز حماد الجمیہ کی قیادت میں ایک چار رکنی وفد سے ملاقات  کررہے تھے ۔

وزیراعظم نے کہاکہ پاکستان توانائی کے شعبے میں سعودی سرمایہ کاری کو انتہائی قدر کی نگاہ سے دیکھتا ہے ۔وفد نے انھیں پندرہ سو میگاواٹ بجلی پیدا کرنے کے قابل تجدید توانائی کے نئے سرمایہ کاری منصوبوں کے بارے میں بتایا ۔AL JUMAIH گروپ نے کے الیکٹرک منصوبے میں بڑے پیمانے پر سرمایہ کاری کی ہے نئے منصوبوں کے تحت بجلی پیداکرنے کیلئے مقامی اور قابل تجدید توانائی کے وسائل بروئے کار لائے جائیں گے ۔

انوارالحق کاکڑ نے کہا کہ کے الیکٹرک گھریلو اور صنعتی صارفین کو بلا تعطل بجلی کی فراہمی یقینی بنانے کیلئے بنیادی ڈھانچے کو مزید بہتر بنائے گی ۔

انہوں نے کہاکہ متبادل توانائی کے شعبے میں کے الیکٹرک کی سرمایہ کاری کی حکمت عملی سے صارفین کیلئے بجلی کے نرخ کوکم کرنے میں مدد ملے گی۔