عمران خان کی کال پر پی ٹی آئی کارکنان کی متعدد شہروں میں ریلیاں

سابق وزیر اعظم اور بانی پی ٹی آئی  عمران خان کی کال پر تحریک انصاف کی جانب سے ملک بھر میں ریلیاں نکالی گئی ہیں جبکہ ریلیوں کو روکنے کے لیے پولیس بھی بھرپور طریقے سے ایکشن میں نظر آ رہی ہے۔ 

پولیس کی جانب سے ریلیوں کے شرکا ء کو منتشر کرنے کیلئے آنسو گیس اور لاٹھی چارج کا بھی استعمال کیا جا رہا ہے ، پی ٹی آئی کارکنان کی جانب سے بھی پولیس کو منتشر کرنے کیلئے پتھراؤ کیا گیا ۔  پولیس کی جانب سے  پی ٹی آئی کا رکنان کی گرفتاریاں بھی عمل میں لائی گئیں ہیں ۔ 

تفصیلات کے مطابق پی ٹی آئی کی جانب سے لاہور ، کراچی، پشاور اور روالپنڈی سمیت ملک کے دیگر شہروں میں ریلیاں نکالی گئیں تاہم پولیس نے کریک ڈاؤن کرتے ہوئے متعدد کارکنوں کو گرفتار کرلیا۔

راولپنڈی میں حلقہ این اے 56 میں بھی ریلی نکالی گئی جو ڈھوک رتہ سے نکلتی ہوئی  ریلی سید پور روڈ پر اختتام پذیر ہوئی، راولپنڈی میں جاتلی کے علاقے میں پولیس نے کریک ڈاؤن کرکے دس کارکنوں کو پولیس نے اپنی تحویل میں لے لیا۔ 

 پشاور میں بھی ریلی نکالی گئی تاہم پولیس نے ریلی کو رنگ روڈ پر روک دیا۔ اس موقع پر پولیس اور پی ٹی آئی کارکنوں میں ہاتھا پائی ہوئی۔ پولیس نے کئی پی ٹی آئی کارکنوں کو گرفتار کرلیا۔

سابق وزیر قانون راجہ بشارت کے حلقہNA55 راولپنڈی میں بھی عوام نے ریلی کا انعقاد کیا  اور اُمیدور حلقہ PP15 زیاد کیانی کی قیادت میں پولیس کی نفری موجود ہونے کے باوجود کارکنان نے ریلی نکالی جس کے باعث پولیس اور کارکنا ن کے درمیان جھڑپیں بھی ہو ئیں اور متعدد کا رکنان کو پولیس نے اپنی تحویل میں لے لیا ۔ 

پولیس نے مؤقف اپنایا کہ پاکستان میں ریلیاں نکالنے کیلئے پی ٹی آئی کارکنان اور پی ٹی آئی قیادت نے حکومت کی جانب سے کوئی این او سی نہیں لیا ۔ 

یاد رہے کہ حماد اظہر کے والد میاں اظہر قومی اسمبلی کے حلقے این اے 129 سے پی ٹی آئی کیجانب سے الیکشن لڑ رہے ہیں ، پولیس کی جانب سے ریلی نکالنے پر ان کو بھی گرفتار کر لیا گیا ہے ،  بانی پی ٹی آئی نے آج امیدواروں کو انتخابی ریلیاں نکالنے کی ہدایات جاری کر رکھی ہیں۔

ریلی میں شریک کا رکنان نے پی ٹی آئی اور عمران خان کے حق میں نعرے بازی بھی کی اور ریلی شرکاء نے کہا کہ اپنی ووٹ کی طاقت سے عمران خان کو اقتدار میں واپس لےکر آئیں گے ۔