مری، گلیات میں شدید برفباری، سیاح ٹریفک جام میں پھنس گئے

مری: مری اور گلیات میں شدید برف باری کے بعد مختلف سڑکوں پر بدترین ٹریفک جام کے باعث سیاح، اہل خانہ اور بچے گاڑیوں میں پھنس گئے۔

مری اور گلیات میں ڈیڑھ فٹ تک برفباری کے بعد مری ایکسپریس وے اور لوئر ٹوپہ تا سحر بگلہ ہائی وے پر شدید ٹریفک جام میں متعدد گاڑیاں پھنس گئیں۔

شدید برفباری کے باعث کئی گھنٹوں تک ٹریفک جام میں پھنسے سیاحوں نے مری ایکسپریس وے اور سری نگر ہائی وے پر ہنگامی اقدامات کی اپیل کی ہے۔

پراونشل ڈیزاسٹر مینجمنٹ اتھارٹی (پی ڈی ایم اے) کے ترجمان کا کہنا ہے کہ مری میں آج بارش اور برف باری کا سلسلہ جاری رہے گا، سیاحوں کو سہولیات فراہم کرنا انتظامیہ کی ذمہ داری ہے۔

ڈپٹی کمشنر (ڈی سی) اسلام آباد نے بتایا کہ مری میں 17 میل سے زیادہ سیاحوں کے داخلے پر بھی پابندی لگا دی گئی ہے۔

دوسری جانب لاہور، فیصل آباد، گجرات، جہلم اور منڈی بہاؤالدین سمیت پنجاب کے کئی علاقوں میں تیز ہواؤں اور گرج چمک کے ساتھ موسلا دھار بارش سے سردی کی شدت میں اضافہ ہو گیا ہے۔

آزاد کشمیر اور گلگت بلتستان کے مختلف علاقوں میں بارش اور برفباری کے باعث متعدد رابطہ سڑکیں بند ہوگئیں۔