منتخب حکومت ایس آئی ایف سی کی پالیسیوں کے تسلسل کو یقینی بنائے گی ،انوارالحق کاکڑ

نگران وزیراعظم انوارالحق کاکڑ نے کہا ہے کہ آئندہ انتخابات میں منتخب ہونے والی حکومت کو چاہیے کہ وہ خصوصی سرمایہ کاری سہولت کونسل کی جانب سے بنائے گئے مثبت ماحول سے فائدہ اٹھاتے ہوئے معاشی پالیسیوں کے تسلسل کو یقینی بنائے ۔

نگران وزیراعظم انوارالحق کاکڑ نے بڑے معاشی سنگ میل کے حصول میں ایس آئی ایف سی، وزارتوں ، محکموں اور متعلقہ فریقوں کے کردار کوسراہا جو مستقبل کی جدوجہد کی رفتاربڑھانے کے نگران حکومت کے عزم کا حصہ ہے ۔

اجلاس میں متعدد اقدامات پرپیش رفت کا بھی جائزہ لیاگیا اور ملک کی معاشی صورتحال میں بہتری کیلئے ادا کئے گئے کردار کوسراہا گیا۔خصوصی سرمایہ کاری سہولت کونسل کی اپیکس کمیٹی نے کاروبار دوست نظام کے قیام اور سرمایہ کاری راغب کرنے کیلئے کیے گئے اقدامات کو سراہا۔اجلاس میں دوست ملکوں کے ساتھ معاشی روابط کے حوالے سے پیش رفت کا جائزہ لیا گیا اور اسے سراہا گیا، اجلاس نے سرمایہ کاری وعدوں کومعاشی منافع جات میں موثر طور پر تبدیل کرنے کی ضرورت پر زور دیا۔کمیٹی نے نہروں کے حوالے سے سٹرٹیجک وژن2030 اور ایف بی آر اصلاحات کی اصولی منظوری بھی دی۔بری فوج کے سربراہ سید عاصم منیر نے ملک کے معاشی استحکام اور اس کے عوام کی سماجی و معاشی بہتری کیلئے حکومت کے اقدامات کی حمایت کیلئے فوج کے پختہ عزم کا اعادہ کیا۔

اجلاس میں وزارتوں نے منصوبوں اور پالیسی اقدامات پر پیشرفت اورسرمایہ کاری راغب کرنے کیلئے کوششوں کے منصوبے پیش کئے۔خصوصی سرمایہ کاری سہولت کونسل کی اپیکس کمیٹی نے مجموعی پیشرفت پراطمینان ظاہر کیا اور مطلوبہ سرمایہ کاری کو عملی شکل دینے کیلئے پوری حکومت کی سوچ کوسراہا ۔