ایمرجنگ پلیئرز کو ٹاپ پلیئرز کے ساتھ وقت گزارنے اور ایکسپوزر ملنے سے کافی فائدہ ہوتا ہے، مصباح الحق

کراچی: قومی کرکٹ ٹیم کے سابق کپتان اور زیڈ کے بی سندھ پریمئیر لیگ کی فرنچائز حیدرآباد بہادرز کے ہیڈ کوچ مصباح الحق نے کہا ہے کہ زیڈ کے بی سندھ پریمئیر لیگ (ایس پی ایل ) میں سندھ کے ایمرجنگ پلیئرز کا ہونا بہت مفید ہے، ٹاپ پلیئرز کے ساتھ وقت گزار کر اور ایکسپوزر ملنے سے کافی فائدہ ہوتا ہے، اس قسم کے ٹورنامنٹ نوجوان پلیئرز کو اعتماد دینے میں کردار ادا کرتے ہیں۔

انہوں نے نیشنل بینک اسٹیڈیم میں گذشتہ شب سندھ پریمئیر لیگ کے میچ کے بعد پریس کانفرنس کرتے ہوئے کہا کہ یہ حقیقت ہے کہ اب سب کی دلچسپی مختصر فارمیٹ کی طرف آگئی ہے، پلیئرز کیلئے بھی لیگز مالی طور پر پرکشش ہوتی ہے۔

انہوں نے کہا کہ ٹیسٹ کرکٹ کبھی ختم نہیں ہوگی، ٹی ٹوینٹی کی وجہ سے ون ڈے کی کشش کم ہوجائے گی۔

انہوں نے کہا کہ کھلاڑی کپتانی دھیرے دھیرے سیکھتا ہے، میرے خیال میں مختلف فارمیٹ میں مختلف کپتان میں کوئی قباحت نہیں، فارمیٹ کے مطابق ذمہ داریاں تقسیم کرنا اچھی بات ہے۔