پاکستان تحریک انصاف کا الیکشن کمیشن سے پولنگ کا وقت بڑھانے کا مطالبہ

پاکستان تحریک انصاف نے پولنگ کا وقت بڑھانے کا مطالبہ کرتے ہوئے  الیکشن کمیشن آف پاکستان میں باضابطہ درخواست جمع کروانے کا فیصلہ کرلیا۔

تحریک انصاف کے چیف آرگنائزر عمر ایوب نے کہا ہے کہ  موبائل اور انٹرنیٹ کی بندش اور بے پناہ رکاوٹوں کے باوجود بڑی تعداد میں ووٹ کیلئے نکلنے پر عوام کے شکرگزار ہیں ،الیکشن عملے کی جانب سے پولنگ کے عمل کو سست روی کا شکار کرنے کی بے پناہ شکایات موصول ہوئی ہیں ۔

انہوں نے کہا کہ بڑی تعداد میں لوگ پولنگ اسٹیشنز کے باہر اپنے ووٹ کا حق استعمال کرنے کیلئے موجود ہیں، الیکشن کمیشن آف پاکستان پولنگ کے وقت میں کم از کم ایک گھنٹے کی توسیع کرتے ہوئے پولنگ کو 6 بجے تک جاری رکھنے کا اعلان کرے ،زیادہ سے زیادہ ووٹرز کو اپنے ووٹ کے حق کے استعمال میں معاونت کی جائے اور انہیں ووٹ ڈالنے کا موقع دیا جائے۔