پاک چین دوستی دنیا کے سامنے مثال بن چکی ہے ، صدر مملکت

صدر ڈاکٹر عارف علوی نے کہا ہے کہ پاکستان اور چین کے درمیان گہرا تعلق دنیا کے لئے مثال ہے۔ پاکستان اور چین کی دوستی کی جڑیں عوام میں پیوست ہیں جن کی بنیاد امن اور تعاون کے ساتھ ساتھ دوطرفہ باہمی تعلقات پر محیط ہے ۔

چین کے سرکاری میڈیا کو دیئے گئے انٹرویو میں انہوں نے پاکستانی عوام اور حکومت کی جانب سے نئے چینی سال پر نیک خواہشات کا اظہار کرتے ہوئے کہا کہ دونوں ممالک نے تمام اہم امور پر ایک دوسرے کے مفادات کا احترام کرتے ہوئے اس کے تحفظ کےلئے کاوشیں کی ہیں۔ مسلسل بدلتی ہوئی دنیا میں پاک چین تعلقات مستحکم ہیں،امن اور تعاون کا جذبہ دوطرفہ مضبوط تعلقات کو ظاہر کرتا ہے،دونوں ممالک ایک دوسرے کی کوششوں کی حمایت کرتے ہیں۔

صدر عارف علوی  نے کہا کہ آئی ٹی،زراعت،گاڑیوں کی تیاری سمیت دیگر شعبوں میں تعاون بڑھایا جارہا ہے۔چین مصنوعی ذہانت سمیت دیگر شعبوں میں سب سے آگے ہے۔

انہوں نے کہا کہ ہم بحران کے وقت ایک دوسرے کے ساتھ کھڑے ہوتے ہیں، دنیا کے مختلف علاقوں میں تنازعات موجود ہیں اور کئی مغربی ممالک ابھرتی ہوئی معیشتوں کی ترقی کو متاثر کرنے کےلئے کوشاں ہیں۔ انہوں نے کہا کہ نیا ورلڈ آرڈر پوری دنیا کےلئے سود مند ہونا چاہئے جہاں تمام لوگوں کو ترقی اور تجارت جاری رکھنے کی اجازت ہو، عالمی سرحدیں صرف فاتح حکمرانی کی بنیاد پر نہیں بلکہ حقائق کی بنیاد پر ہونی چاہئیں۔ صدر مملکت نے کہا کہ پاکستان اور چین امن سے محبت کرنے والے ملک ہیں ، بیلٹ اینڈ روڈ اینیشی ایٹو (بی آر آئی) عوامی ترقی کا منصوبہ ہے جس سے ایک مستحکم اور صحت مندمعیشت میسر آ سکے گی۔