پاکستان کرکٹ ٹیم کے سابق کپتان سرفراز احمد کا کراچی میں یونیورسٹی بنانے کا اعلان

سابق قومی کپتان سرفراز احمد نے کراچی میں مفت تعلیم کے لیے یونیورسٹی بنانے کا اعلان کر دیا، زیر تعلیم طلبا اور طالبات کو بلا معاوضہ تعلیمی سہولیات فراہم کی جائیں گی۔

سرفراز احمد کا کہنا ہے کہ مہنگائی کے دور میں حصول علم بہت مشکل ہوگئی ہے، طالب علموں کے لیے تعلیم کے مالی اخراجات کا ادا کرنا ناممکن سا ہوگیا ہے جبکہ بڑھتی ہوئی فیس کے سبب بعض اوقات تعلیمی ادارے میں داخلہ لینا بھی ممکن نہیں ہوتا، مالی استعداد نہ ہونے کی وجہ سے تعلیم سے محروم نہیں ہونا چاہیے۔

نیشنل کرکٹر سابق کپتان جناب سرفراز احمد جلد کراچی میں انٹرنیشنل یونیورسٹی کے قیام کا ارادہ رکھتے ہیں جہاں تمام طلبہ کو اسکالر شپ پروگرام کے تحت بلکل مفت تعلیم دی جائے گی جس کا اظہار آج انھوں نے JDC کے دورہ کے موقع پر سماجی رہنما ظفر عباس کے ہمراہ ایک ویڈیو میں کیا ساتھ یہ بھی… pic.twitter.com/8f3026GLKf

— Syed Zafar Abbas (@ZafarJdc) February 11, 2024

انہوں نے کہا کہ فلاحی مقاصد کے لیے کوشاں غیر سرکاری تنظیم کے ساتھ مل کر یونیورسٹی قائم کرنے کا فیصلہ کیا ہے، اس یونیورسٹی میں طلبا کو مفت تعلیم فراہم کریں گے تاکہ وہ علم حاصل کرکے اپنا مستقبل سنواریں اور ملک و قوم کا نام روشن کریں۔

سرفراز احمد کا کہنا ہے کہ یونیورسٹی کے قیام کے لیے بھرپور کوشش کر رہے ہیں، اس ضمن میں عوامی تعاون بہت ضروری ہے، منصوبہ کو پایہ تکمیل تک پہنچانے کے لیے تمام اسٹیک ہولڈرز سمیت ملک بھر کی جامعات اور ماہرین تعلیم سے بھی رابطے کرکے تعاون حاصل کیا جائے گا۔