خیبرپختونخوا اسمبلی اجلاس ،نومنتخب ارکان اسمبلی نے حلف اٹھا لیا

خیبرپختونخوا اسمبلی کا اجلاس جاری ہے، جہاں نومنتخب ارکان اسمبلی نے حلف اٹھا لیا، اسپیکر مشتاق غنی نے نو منتخب ارکان اسمبلی سے حلف لیا۔

خیبرپختونخوا اسمبلی کے اسپیکر مشتاق غنی اسمبلی ہال پہنچے جس کے بعد نومنتخب خیبرپختونخوا اسمبلی کا پہلا اجلاس اسپیکر مشتاق غنی کی زیر صدارت شروع  ہوا۔اجلاس سے قبل خیبرپختونخوا اسمبلی میں شہداء کے لیے فاتحہ خوانی کی گئی جبکہ دہشت گردی کے خلاف جنگ میں شہداء کے لیے دعا بھی کی گئی۔

اسپیکر اور ڈپٹی اسپیکر خیبر پختونخوا کےانتخاب کےلئے پولنگ کل صبح 10 بجےہو گی۔

اس سے قبل خیبرپختونخوا اسمبلی کا اجلاس تاخیر کا شکار ہوگیا تھا، اسمبلی میں انتہائی رش کے باعث ممبران کو پہنچنے میں مشکلات کا سامنا کرنا پڑا، اسمبلی ہال میں 300 وزٹرز کی گنجائش ہے، 1800 سے زائد وزٹرز کو کارڈ جاری کیے گئے۔

پی ٹی آئی کارکنوں کی جانب سے اسمبلی ہال میں داخل ہونے کے لیے دھکم پیل کی گئی، اسمبلی میں نو منتخب ممبران کی آمد کے لیے گھنٹیاں بھی بجائی گئیں۔

مسلم لیگ ن کی نو منتخب ثوبیہ شاہد اسمبلی ہال پہنچی اور وہ گھڑی اٹھا کر اسمبلی فلور پر کھڑی ہوگئی۔

پی ٹی آئی کارکنوں نے ثوبیہ شاہد کے خلاف نعرہ بازی کی، پی ٹی آئی کارکنوں نے ثوبیہ شاہد پر کاغذ اورلوٹا پھینک دیا جبکہ ثوبیہ شاہد نے لوٹا بھی اٹھاکر گھڑی کے ساتھ لہرا دیا۔

ثوبیہ شاہد نے لوٹا وزیر اعلیٰ کی کرسی پر رکھ دیا جبکہ اسمبلی اسٹاف نے وزیراعلیٰ کی کرسی سے لوٹا ہٹا کر ثوبیہ شاہد کو منع کردیا۔

اسمبلی اسٹاف کی جانب سے منع کرنے کے بعد ثوبیہ شاہد اپنی نشست پر بیٹھ گئیں۔