اسرائیل غزہ میں امدادی سامان کی ترسیل کو سودے بازی کےلئے استعمال نہ کرے، جو بائیڈن

امریکی صدر جو بائیڈن نے اسرائیل کو خبر دار کیا ہے کہ امدادی سامان کی ترسیل کو جنگ بندی کے لئے مذاکرات میں ایک سودے بازی کے طور استعمال نہیں کیا جا سکتا ہے۔

غیر ملکی خبر رساں ادارے کے مطابق جو بائیڈن نے اسٹیٹ آف یونین تقریر کے دوران اسرائیل اور غزہ کے درمیان عارضی جنگی وقفے کے فوری اہتمام کا مطالبہ کرتے ہوئے اسرائیلی قیادت کو متوجہ کرتے ہوئے کہا کہ انسانی بنیادوں پر امداد کی فراہمی مذاکرات میں ثانوی حیثیت کی حامل نہیں ہو سکتی ہے۔ اسے انسانی جانیں بچانے اور انسانی تحفظ کے لئے ترجیح اول کے طور پر دیکھنا چاہیے۔ غزہ میں قحط کا خطرہ ہے۔

صدر جوبائیڈن نے کہا کہ ہم کوشش کر رہے ہیں کہ جلد سے جلد چھ ہفتوں کے لئے جنگ بندی ہو جائے۔ یہ جنگ بندی انسانی بنیادوں پر ہونی چاہیے تاکہ انسانی بحران اور المیے سے بچا جا سکے۔

جو بائیڈن نے اس موقع پر دو ریاستی حل کے حق میں امریکی موقف کو دہرایا تاکہ خطے میں پائیدار امن ممکن ہو سکے اور ترقی و خوشحالی کا دور شروع ہو۔