کورونا وائرس کی ادویات کی مہنگے داموں فروخت روکنے کیلئے سخت اقدامات کا فیصلہ

عالمی وباء کورونا وائرس کی ادویات کی مہنگے داموں فروخت روکنے کیلئے سخت اقدامات کا فیصلہ کرلیا گیا۔ تفصیلات کے مطابق ڈرگ ریگولیٹری اتھارٹی نے کورونا کی ادویات کی مہنگے داموں فروخت روکنے کیلئے سخت اقدامات کرتے ہوئے ملک کی ادویات مارکیٹس کی سرویلنس کا فیصلہ کیا ہے ، اس ضمن میں ملک بھر میں کورونا کی ادویات کی دستیابی کو بھی یقینی بنانے کی ہدایت کردی گئی ہے۔

بتایا گیا ہے کہ سربراہ ڈریپ ڈاکٹرعاصم رؤف کی ہدایت پر آزاد کشمیر ، گلگت بلتستان اور چاروں صوبائی دفاتر کو ہنگامی مراسلہ جاری کیا گیا ہے، جس میں سی ای اوڈریپ نے کہا ہے کہ کورونا ادویات کی دستیابی کیلئے ادویات مارکیٹ کی سرویلنس کی جائے اور کورونا کی ادویات کی مہنگی فروخت روکنے کیلئے سخت اقدامات کیے جائیں اور مذکورہ ادویات کی دستیابی ہرصورت یقینی بنائی جائے جس کے لیے مارکیٹ مانیٹرنگ کی جائے۔

مراسلے میں کہا گیا ہے کہ ڈریپ کی ویب سائٹ پر کورونا ادویات کی پرائس لسٹ موجود ہے ، جہاں حکومت نے کورونا ادویات کی زیادہ سے زیادہ قیمت کا تعین کر رکھا ہے، ڈریپ افسران کورونا ادویات کی مقررہ قیمتوں پر دستیابی کو یقینی بنائیں کیوں کہ کورونا وباء کی ادویات کی مقررہ سے زائد قیمت پر فروخت قانون کے خلاف ہے ، ڈریپ افسران زائد قیمت پرفروخت کی شکایات پرفوری کارروائی کریں اور قانون شکن عناصرکے خلاف سخت کارروائی عمل میں لائی جائے۔

دوسری طرف لاہور میں جان بچانے والی ادویات کی قیمتوں میں اضافہ ہو گیا، انسولینز کی قیمت بڑھ کر764 روپے، ہیمولین بڑھ کر915 اور ٹرائی اوپٹل 50 گولیوں کا پیک357 روپے مہنگا ہوگیا، ان ادویات کی قیمتیں رواں ہفتے بڑھی ہیں ، تفصیلات کے مطابق جان بچانے والی ادویات کی قیمتوں میں اضافے سے مہنگائی سے تنگ عوام کی مزید مشکلات بڑھ گئیں کیوں کہ لاہور کے میڈیکل اسٹورز مالکان پر ادویات کی قیمتوں میں اضافہ ہو گیا ہے۔

بتایا گیا ہے کہ شوگر کے مریضوں کیلئے انسولینز 41 سے 70 روپے تک مہنگی، ٹرائی اوپٹل 50 گولیوں کا پیک 357 روپے، ہیمولین کی قیمت 874 سے بڑھ کر 915 روپے، انسولین کی قیمت 694 سے بڑھ کر 764 روپے مہنگا ہوگیا ہے، سکارٹ پلس 10 گولیوں کا پیک 16 روپے، سکارٹ 30 گولیوں کا پیک 6 روپے مہنگا ہوگیا ہے ۔