10سال بعد پاکستانی شہریوں کے لئے کویت کا ویزا بحال

تفصیلات کے مطابق  10سال بعد پاکستانی شہریوں کے لئے کویت کا ویزا بحال ہوگیا ہے۔وزیر داخلہ شیخ رشید احمد کی کویت کے وزیراعظم شیخ صباح خالدالحامدالصباح سے ملاقات ہوئی جس میں  پاک کویت دوطرفہ تعلقات سمیت باہمی دلچسپی کےامور پر گفتگو کی گئی ۔

وزیر داخلہ شیخ رشید احمد کی کویتی وزیر اعظم سے ویزا بحالی پر بات چیت ہوئی۔وزیر داخلہ نے کویتی وزیر اعظم کو وزیر اعظم عمران کا خصوصی مراسلہ بھی پیش کیا۔کویتی وزیر اعظم اور وزیر داخلہ شیخ رشید احمد ملاقات میں اہم فیصلے کیے گئے ہیں ۔

جی این این کے مطابق  2011 سے بند پاکستانی شہریوں کے لئے کویتی ویزہ کی بحالی پر بڑی پیش رفت ہوئی ہے۔پاکستان اور کویت کے درمیان فیملی اور بزنس ویزہ فوری بحال کرنے کا فیصلہ کیا گیا ہے۔پاکستانی ورکرز کو معاہدے کے مطابق کویتی ویزہ جاری کرنے کا بھی فیصلہ کیا گیا ہے۔میڈیکل اور آئل فیلڈ میں ٹیکنیکل ویزہ پر کوئی پابندی نہیں ہوگی۔خلیج ممالک میں رہنے والے پاکستانی آن لائن ویزہ لے کر اب کویت آسکیں گے۔

کویتی وزیر اعظم نے کہا ہے کہ  پاکستان اور کویت کے درمیان تعلقات سات دہائیوں پر محیط ہیں،پاکستان اور کویت کے عوام کے درمیان پیار اور اعتماد کا رشتہ ہے۔

وزیر داخلہ شیخ رشید احمد کا کہنا ہے کہ پاکستان اور کویت کے درمیان تعلقات انتہائی دیرینہ ہیں،باہمی تعلقات کی بنیاد باہمی بھائی چارہ اور محبت ہے۔ تمام پاکستانی کویت کو اپنا دوسرا گھرسمجھتے ہیں۔پاکستانی خاندانوں اور کاروباری طبقے کو کویتی ویزہ بندش سے بے پناہ مسائل درپیش تھے۔  پاکستانی لیبر کا کویت کی اولین ترقی میں بہت اہم کردار ہے۔

شیخ رشید احمد  نے کہا کہ  ورکرز ویزہ بحال ہونے سے پاکستانیوں کے لئے روزگار کے نئے مواقع پیدا ہونگے۔ کاروباری ویزہ بحالی سے دونوں ملکوں کے درمیان تجارت بڑھے گی۔