پاکستان مسئلہ فلسطین کی حمایت جاری رکھے گا ،صدر مملکت

صدر مملکت  آصف علی زرداری نے کہا ہے کہ پاکستان اپنی خود مختاری پر کبھی سمجھوتہ نہیں کرے گا۔

انہوں نے آج شکرپڑیاں اسلام آباد کے پریڈ گرائونڈ میں یوم پاکستان کے حوالے سے فوجی پریڈ سے خطاب کرتے ہوئے کہا کہ پاکستان اپنے تمام ہمسایہ ملکوں کے ساتھ اچھے تعلقات چاہتا ہے۔تاہم انہوں نے کہا کہ پاکستانی قوم اور مسلح افواج ملک کے دفاع اور کسی بھی قسم کی جارحیت کا جواب دینے کیلئے ہمہ وقت تیار ہیں ، صدر نے بھارت کے غیر قانونی زیر قبضہ جموں و کشمیر میں بھارتی مظالم اور انسانی حقوق کی خلاف ورزیوں کی مذمت کرتے ہوئے بین الاقوامی برادری پر زور دیا کہ وہ اقوام متحدہ کی سلامتی کونسل کی قراردادوں پر عملدرآمد یقینی بنائے۔

صدر مملکت  نے تمام سیاسی جماعتوں پر زور دیا کہ وہ سیاسی مفادات سے بالاتر ہو کر ملک کی سلامتی اور خوشحالی کیلئے مل کر کام کریں۔آصف علی زرداری نے فلسطینی عوام کے ساتھ یکجہتی کا اظہار کرتے ہوئے عالمی برادری پر زور دیا کہ وہ فلسطین میں بچوں اور خواتین سمیت بے گناہ فلسطینیوں کے قتل عام کا سلسلہ فوری طور پر رکوانے کو یقینی بنائے۔

انہوں نے ظلم کے خلاف منصفانہ جدوجہد میں کشمیریوں کے شانہ بشانہ رہنے کے حوالے سے پاکستان کے عزم کا اعادہ کیا ۔ملک کو درپیش چیلنجز کا حوالہ دیتے ہوئے صدر نے کہا کہ انتخابی عمل کے بعد ایک جمہوری حکومت قائم ہو گئی ہے۔انہوں نے کہا کہ معیشت بہتر بنانے کیلئے خصوصی سرمایہ کاری سہولت کونسل کا قیام عمل میں لایا گیا ہے۔

انہوں نے کہا کہ پاکستان مسئلہ فلسطین فلسطینی عوام کی امنگوں کے مطابق حل ہونے تک ان کی حمایت جاری رکھے گا ۔