اینٹی نارکوٹکس نےمختلف کارروائیوں میں 1750 کلو گرام سے زائد منشیات برآمد کرلیں

اسلام آباد: اینٹی نارکوٹکس فورس (اے این ایف) نے ملک بھر میں 9 کارروائیوں کے دوران 1750 کلو گرام سے زائد منشیات اور 25000 نشہ آور گولیاں برآمد کرکے 8 ملزمان کو گرفتار کرلیا ۔ 

اینٹی نارکوٹکس کے ترجمان  نے بتایا کہ اسلام آباد ایئرپورٹ پر جدہ جانے والی خاتون مسافر سے 25000 نشہ آور گولیاں برآمد ہوئیں۔ دوسری کارروائی میں سیالکوٹ کورئیر آفس سے یونان بھیجے جانے والے پارسل سے 2.2 کلو آئس برآمد کر لی گئی۔ قلعہ عبداللہ میں ٹوبہ اچکزئی سے 1425 کلو گرام چرس برآمد ہوئی۔ ویسٹرن بائی پاس کوئٹہ کے قریب سے گرفتار دو ملزمان سے 225 کلو گرام چرس برآمد کر لی گئی۔ نوکنڈی چاغی کے علاقے سے 100 کلو افیون اور گوادر سے 45 کلو گرام چرس برآمد کر لی گئی۔

ترجمان کے مطابق آر سی ڈی روڈ حب کے قریب گرفتار ملزم کے قبضے سے 3 کلو چرس برآمد کر لی گئی۔ ڈیرہ غازی خان میں سخی سرور روڈ پر گرفتار تین ملزمان سے ڈیڑھ کلو آئس برآمد کر لی گئی۔

ترجمان اینٹی نا رکوٹکس  نے مزید بتایا کہ نیشنل ہائی وے حیدرآباد سے گرفتار ملزم سے 300 گرام آئس برآمد ہوئی ہے۔ تمام گرفتار ملزمان کے خلاف انسداد منشیات ایکٹ کے تحت مقدمات درج کر لیے گئے ہیں جبکہ مزید تفتیش جاری ہے۔