عالمی برادری فلسطینوں پر مظالم بند کرنے کیلئے اسرائیل پر دباؤ ڈالے ،وزیر اعظم

وزیر اعظم شہباز شریف نے عالمی برادری سے مطالبہ کیا ہے کہ وہ اسرائیل پر فلسطینیوں کے خلاف مظالم بند کرنے کے لیے دبائو ڈالے۔

القدس کے عالمی دن اورجمعة الوداع کے موقع پر اپنے پیغام میں انہوں نے غزہ میں اسرائیلی مظالم کی شدید مذمت کی۔

انہوں نے کہا کہ گزشتہ سال اکتوبر سے اب تک غزہ میں سترہ ہزار بچوں سمیت بتیس ہزار فلسطینی شہید اور ستر ہزار زخمی ہو چکے ہیں۔ اسپتالوں، پناہ گزینوں کے کیمپوں اور بچوں کے اسکولوں کو جان بوجھ کر نشانہ بنایا گیا ہے اور انسانی امداد تک رسائی کو روک دیا گیا ہے۔

وزیراعظم نے افسوس کا اظہار کیا کہ اقوام متحدہ کی سلامتی کونسل کی جانب سے جنگ بندی کی قرارداد کے باوجود غزہ میں معصوم شہریوں پر بلا اشتعال بمباری کا سلسلہ بدستور جاری ہے۔

وزیراعظم نے کہا کہ پاکستان اسرائیلی قبضے سے فلسطینیوں کی آزادی اور 1967 سے پہلے کی سرحدوں کے مطابق آزاد فلسطینی ریاست کے قیام تک بے مسلح فلسطینی بھائیوں اور بہنوں کی اخلاقی اور سفارتی حمایت جاری رکھے گا۔

انہوں نے پاکستانی  قوم سے بھی اپیل کی کہ وہ جمعتہ الوداع کے موقع پر پاکستان کی امن و سلامتی اور ترقی و خوشحالی کے لیے دعا کریں۔

وزیراعظم نے پاکستان سمیت دنیا بھر کے مسلمانوں سے اپیل کی کہ وہ جمعة الوداع کے موقع پر اپنے فلسطینی اور کشمیری بھائیوں اور بہنوں کو یاد رکھیں اور اللہ تعالی سے ان کی مشکلات میں آسانی کے لیے دعا کریں۔