وزیر اطلاعات عطاتارڑ کی صحافیوں کے مسائل حل کرنے کی یقین دہانی

کراچی  : وزیراطلاعات ونشریات عطااللہ تارڑ نے صحافیوں، میڈیا کارکنان اور میڈیا ہائوسز کو درپیش تمام مسائل ترجیحی بنیادوں پر حل کرنے کے حکومت کے عزم کا اعادہ کیا ہے۔

عطا تارڑ نے  پاکستان نیوز پیپرز سوسائٹی، کونسل آف پاکستان نیوز پیپرایڈیٹرز اور پاکستان براڈ کاسٹرز ایسوسی ایشن کے عہدیداران سے آج کراچی میں الگ الگ ملاقاتوں میں کیا۔

انہوں نے اس موقع پر میڈیا کارکنان اور ہائوسز کی فلاح وبہبود یقینی بنانے کیلئے ٹھوس اقدامات کرنے کا عزم ظاہر کیا۔

عطااللہ تارڑ نے کہا کہ وہ میڈیا کارکنان اور صحافیوں کے مسائل سے بخوبی آگاہ ہیں اور ان کے حقوق کے تحفظ کے لئے ٹھوس اقدامات کرینگے۔وزیراطلاعات نے عہدیداروں کو میڈیا ہائوس کے واجبات جلد از جلد ادا کرنے کیلئے اپنے مکمل تعاون کا یقین دلایا ، انہوں نے کہا کہ اس سلسلے میں وزیراعظم شہبازشریف کی ہدایات پر مربوط کوششیں جاری ہیں۔انہوں نے کہا کہ اقتصادی رابطہ کمیٹی نے میڈیا ہائوسز کے واجبات اور بقایاجات کی ادائیگی کیلئے ضمنی گرانٹ کی منظوری دی۔

انہوں نے کہا کہ صحافیوں کے طبی علاج کیلئے جلد صحت کارڈز جاری کئیے جائینگے۔ملک کی معاشی صورتحال کے حوالے سے وزیراطلاعات نے وزیراعظم شہبازشریف کے ویژن کے تحت اقتصادی مسائل کے حل کیلئے حکومت کے مضبوط عزم کا اظہار کیا۔

انہوں نے کہا کہ ایف بی آر کی ڈیجیٹلائزیشن  پر کام شروع ہوگیا ہے جسکا مقصد دستاویزی معیشت کو یقینی بنانا ہے۔