سعودی وزیر خارجہ کی قیادت میں اعلیٰ سطحی سعودی وفد کل پاکستان پہنچے گا

اسلام آباد: وزیر خارجہ شہزادہ فیصل بن فرحان بن عبداللہ کی قیادت میں اعلیٰ سطح کا سعودی وفد کل سے پاکستان کا دورہ کرے گا ۔

وفد میں سعودی وزیر برائے پانی و زراعت انجینئر عبدالرحمٰن عبدالمحسن الفادلی، وزیر صنعت و معدنی وسائل بندر ابراہیم الخورائف، نائب وزیر سرمایہ کاری بدر البدر، سعودی خصوصی کمیٹی کے سربراہ محمد مازید التویجری اور دیگر شامل ہیں۔ اور وزارت توانائی اور سعودی فنڈ برائے عمومی سرمایہ کاری کے سینئر حکام بھی شرکت کریں گے ۔ 

یہ دورہ بنیادی طور پر وزیر اعظم محمد شہباز شریف اور ولی عہد اور سعودی عرب کے وزیر اعظم محمد بن سلمان کے درمیان مکہ المکرمہ میں ہونے والی حالیہ ملاقات کے دوران دو طرفہ اقتصادی تعاون کو بڑھانے کے لیے طے پانے والے مفاہمت کو تیز کرنے کے لیے ہو رہا ہے۔

سعودی وفد کی صدرمملکت آصف علی زرداری ، وزیراعظم شہباز شریف ، وزیر خارجہ  اور ہم منصب وزراء، چیف آف آرمی سٹاف اور ایس آئی ایف سی کی ایپکس کمیٹی سے ملاقاتیں متوقع ہیں۔

یاد رہے کہ اس دورے کا مقصد دوطرفہ تعاون کو بڑھانے اور باہمی طور پر فائدہ مند اقتصادی شراکت داری کو مثبت تحریک دینا ہے۔