ن لیگ آزادکشمیر کے سینئر رہنما سردار طاہر اقبال پی ٹی آئی میں شامل

وزیر اعلی پنجاب کے معاون خصوصی سردار تنویر الیاس نے  پریس کانفرنس کرتے ہوئے کہا ہے کہ  سردار طاہر اقبال کی طویل سیاسی جدوجہد ہے، سردار طاہر اقبال کی شمولیت سے تحریک انصاف مضبوط ہوگی، ہماری دیگر سیاسی رہنماؤں سے بات چیت چل رہی ہے،  اہم شخصیات آنے والے دنوں میں تحریک انصاف میں شمولیت اختیار کریں گی۔

سردار تنویر الیاس نے کہا کہ  ہم نے آزادکشمیر میں میرٹ کی پامالی کی بات کی،فاروق حیدر نے پہلے سپریم کورٹ میں واردات کی، آج راجہ فاروق حیدر ہائیکورٹ میں واردات کرنے جارہے ہیں، ہم اس میرٹ کی پامالی کیخلاف سخت مزاہمت کریں گے۔سردار تنویر الیاس نے کہا کہ  جانے والی حکومت کو کیا اختیار ہے کہ ججز کی تقرری کرے، ججز کی تقرریوں میں پیسہ چل رہا ہے۔

معاون خصوصی نے کہا کہ   آزاد کشمیر میں بھی باقی ملک کی طرح نگران حکومت ہونی چاہیے،نگران حکومت آزادکشمیر میں صاف شفاف الیکشن کروا سکتی ہے، مسلم لیگ ن اور پیپلز پارٹی کی نشستیں دو دو سے زیادہ نہیں دیکھ رہا۔

سردار تنویر الیاس کا کہنا تھا کہ   دوسرے فیز کے ٹکٹ جلد اعلان ہونے جارہے ہیں،جو لوگ ٹکٹوں کی تقسیم سے مطمئن نہیں ان کو ساتھ لیکر چلیں گے،میری کوشش ہوگی ناراض لوگوں کو ٹکٹ ہولڈر کی حمایت پر قائل کروں، امید ہے ہماری پارٹی کے لوگ آزاد الیکشن میں نہیں جائیں۔

معاون خصوصی پنجاب سردار تنویر الیاس کا مزید کہنا تھا کہ  تینوں ڈویژن کے تمام حلقوں پر نظر رکھے ہوئے ہیں، خلاف میرٹ ججز کے معاملے کو وزیراعظم پاکستان کے نوٹس میں لایا گیا ہے،ججز کا پینل تشکیل دیتے ہوئے وزارت امور کشمیر کو نظر انداز کیا گیا،آزاد کشمیر حکومت نے بڑا پینل تشکیل دے کر مرضی کے لوگوں کی نامزدگی کی۔