وزیر اعلی سندھ نے آئندہ مالی سال کے مجوزہ وفاقی بجٹ پر اعتراض اٹھادیا

تفصیلات کے مطابق وزیراعلی سندھ  مرادعلی شاہ نے وزیراعظم عمران خان کوخط لکھ دیا ہے۔وزیر اعلی سندھ مراد علی شاہ کا خط میں کہنا ہے کہ  جب سے پی ٹی آئی برسراقتدار آئی ہے سندھ کے ساتھ تصب برتاجارہاہے، سندھ کے لوگوں کے ساتھ ناانصافی کی جارہی ہے،  وفاق کے پبلک سیکٹر ڈویلپمنٹ پروگرام میں سندھ کے منصوبے نظر انداز کردئیے گئے ہیں، دوہزار سترہ کے وفاق بجٹ میں سندھ کے 27اور 22-2021میں صرف 6اسکیمز شامل کی گئیں ۔

مرادعلی شاہ نے خط میں لکھا ہے کہ  سندھ کے ساتھ موجودہ وفاقی حکومت نے ناانصافی کا تسلسل برقرار رکھاہوا ہے، قومی اقتصادی کونسل کا اجلاس نہ بلا کر آئین کے آرٹیکل 156کی خلاف ورزی کی جارہی ہے، آئندہ مالی سال کے پی ایس ڈی پی میں این ایچ اے کی پنجاب کے لئے22سندھ کو صرف دو اسکیمز دی گئیں ،سندھ کو خیبر پختونخواہ سے کم منصوبے دئیے گئے۔

خط میں کہا گیا ہے کہ  بدقسمتی سے سندھ کو وفاق نے ترقیاتی منصوبوں میں بھی نظرانداز کررکھا ہے، سیہون جامشورو شاہراہ کے لئے سندھ نے وفاق کو 2017میں 50فیصد رقم دی تھی،  4سال گزرنے کے باوجود این ایچ اے نے سیہون جامشورو شاہراہ کی تعمیر مکمل نہیں کی۔سیہون جامشورو شاہراہ پر انسانی جانوں کے ضیاع کی ذمہ دار وفاقی حکومت ہے۔