اسرائیلی فورسز نے شیخ جراح میں فلسطینی کارکن منیٰ الکرد کو گرفتار کرلیا

غیر ملکی خبر رساں ادارے کے مطابق  اسرائیلی فورسز کی مقبوضہ بیت المقدس میں صیہونی آبادکاری کیخلاف آوازیں خاموش کروانے کی کوشش جاری  ہیں ۔ شیخ جراح کے علاقے میں فلسطینیوں کو ان کے گھر سے نکالنے  کیخلاف فلسطینی کارکن گرفتار کرلیا گیا ہے۔

فلسطینی کارکن منیٰ الکرد کو ان کے گھر پر چھاپا مارکرگرفتار کیاگیا، پولیس نے 23سالہ سماجی کارکن کے دو جڑواں بھائیوں کو بھی خود کو پولیس کے حوالے کرنے کا نوٹس دیا۔

گزشتہ روز مقبوضہ بیت المقدس کے علاقے شیخ جراح میں بے دخل فلسطینیوں سے اظہارِ یک جہتی کے لیے پُرامن دوڑ منعقد کی گئی تھی۔اسرائیلی فورسز نے دوڑ پر بھی دھاوا بول کر 23 فلسطینیوں کو زخمی کر دیا تھا۔

دوڑ کی کوریج کرنے والی غیر ملکی میڈیا  کی خاتون صحافی کو اسرائیلی فورسز نے زد و کوب کیا، کیمرہ توڑ دیا اور انہیں حراست میں بھی لے لیا تھا۔مقبوضہ بیت المقدس میں پرامن دوڑ کی کوریج کرنے والی صحافی کو اسرائیلی فورسز نے تشدد کا نشانہ بنایا، بعد میں انہیں شيخ جراح کے علاقے میں کوریج نہ کرنے کی شرط پر رہا کر دیا گیا تھا۔