خسرے سے جاں بحق ہونے والے بچوں کی تعداد 7ہوگئی

پتوکی میں خسرے سے جاں بحق ہونے والے بچوں کی تعداد 7ہوگئی۔

وزیراعلی پنجاب کے نوٹس کے بعد صوبائی وزیر صحت خواجہ عمران نذیر نے پتوکی کا ہنگامی دورہ کیا اور خسرہ آئیسولیشن وارڈ میں زیر علاج بچوں کی خیریت دریافت کی۔

تفصیلات کے مطابق پتوکی کے نواحی علاقے ٹھٹہ کمیانہ، دولو گرو اور دیگر میں خسرے سے جاں بحق ہونے والے بچوں کی تعداد سات ہوگئی۔

صوبائی وزیر خواجہ عمران نذیر نے مریض سے ویکسینیشن سے متعلق پوچھا اور انہیں ویکسینیشن نا کروانے پر اپنے بچوں کی صحت کا دھیان رکھنے اور ویکسینیشن کروانے سے متعلق آگاہی دی۔

میڈیا سے گفتگو کرتے ہوئے خواجہ عمران نذیر کا کہنا تھا کہ ابھی تک جاں بحق ہونے والے بچوں میں خسرے کی علامات رپورٹ نہیں ہوئیں اور تین دن تک انکی رپورٹ سامنے آجائی گی اور اگر کوئی ذمہ دار پایا گیا تو انکے خلاف محکمانہ کارروائی ہوگی۔

انہوں نے کہا کہ متاثرہ علاقہ میں اسپیشل ٹیمیں تعینات کردی گئیں ہیں جو گھر گھر جاکر معائنہ کررہی ہیں۔وزیراعلی مریم نواز صحت کی سہولیات لوگوں کے گھروں میں پہنچا رہی ہیں اس کے علاوہ پتوکی میں 16 بچے زیر علاج ہیں اور انہیں صحت کی سہولیات فراہم کی جارہی ہیں، اور انکا علاج فری ہورہا ہے۔