آزادی مارچ کیس: عمران خان سمیت دیگر پی ٹی آئی رہنما 2 مقدمات میں بری

ڈسٹرکٹ اینڈ سیشن کورٹ اسلام آباد نے آزادی مارچ کے دوران توڑ پھوڑ سے متعلق 2 مقدمات میں بانی پی ٹی آئی عمران خان اور شاہ محمود قریشی کو بری کر دیا۔

جوڈیشل مجسٹریٹ احتشام عالم نے پی ٹی آئی قیادت کے خلاف آزادی مارچ کے دوران توڑ پھوڑ اور دفعہ 144 کی خلاف ورزی پر درج دو مقدمات کی سماعت کی۔

سماعت کے دوران پی ٹی آئی رہنما علی محمد خان، نعیم حیدر پنجوتھا، سردار مصروف ایڈووکیٹ ، آمنہ علی ایڈووکیٹ کے ہمراہ عدالت میں پیش ہوئے، جبکہ تمام ملزمان نے بریت کی درخواستیں دائر کیں ، عدالت نے اسد عمر ،علی محمد خان اور مراد سعید کو بھی مقدمات سے بری کر دیا۔

یاد رہے کہ عمران خان ، شاہ محمود قریشی و دیگر رہنماؤں کے خلاف دونوں مقدمات تھانہ گولڑہ میں درج تھے۔

خیال رہے کہ مارچ میں ڈسٹرکٹ اینڈ سیشن کورٹس اسلام آباد نے لانگ مارچ کے دوران احتجاج اور توڑ پھوڑ کے مزید 2 کیسز میں عمران خان اور سربراہ عوامی لیگ شیخ رشید سمیت 11 ملزمان کو بری کردیا تھا۔