گرمی کی شدت میں کمی،محکمہ موسمیات نے پیشگوئی کردی

محکمہ موسمیات نے گلگت بلتستان اور خیبرپختونخوا کے چند علاقوں میںبارش کی پیشگوئی کی ہے جبکہ ملک کے بیشتر علاقوں میں موسم گرم رہنے کا امکان ظاہر کیا ہے۔

محکمہ موسمیات کا کہنا ہے کہ سندھ، پنجاب اور خیبر پختونخوا میں گرمی کی شدت میں کمی آئی ہے۔ تاہم مختلف حصوں میں سورج کی تپش برقرار رہے گی جبکہ گلگت بلتستان اور بالائی خیبر پختونخوا میں کہیں کہیں بارش کی توقع ہے۔

محکمہ موسمیات نے کراچی کے موسم کے حوالے سے بتایا کہ 24 گھنٹوں میں شہر کا موسم گرم اور مرطوب رہنے کا امکان ہے ، شہر کا کم سے کم درجہ حرارت 29.3 ڈگری سینٹی گریڈ ریکارڈ کیا گیا جبکہ زیادہ سے زیادہ درجہ حرارت 35 سے 37 ڈگری سینٹی گریڈ رہنے کا امکان ہے۔

گزشتہ روز سب سے زیادہ درجہ حرارت جیکب آباد میں 43 ، دادو، مٹھی، تربت، بہاولپور میں 42، سبی، موہن جودڑو، کوٹ ادو، ٹنڈو جام اور روہڑی میں 41 ڈگری سینٹی گریڈ ریکارڈ کیا گیا۔

شہر لاہور میں آئندہ 24 گھنٹوں میں بارش کا کوئی امکان نہیں جبکہ کراچی میں موسم گرم اور مرطوب رہے گا۔

دوسری جانب شہر قائد میں مطلع جزوی ابر آلود،موسم گرم اور مرطوب ہے،موجودہ درجہ حرارت 31 ڈگری سینٹی گریڈ ، زیادہ سے زیادہ  37 ڈگری سینٹی گریڈ تک جانے کا امکان ہے،ہوا میں نمی کا تناسب70 فیصد ہے۔