بانی پی ٹی آئی کی توشہ خانہ میں نااہلی کے خلاف درخواست پر سماعت بغیر کارروائی ملتوی

سابق وزیراعظم اور بانی پی ٹی آئی عمران خان کی توشہ خانہ میں نااہلی کے خلاف درخواست پر سماعت بغیر کارروائی کے ملتوی کردی گئی۔

لاہور ہائیکورٹ میں بانی پی ٹی آئی کی توشہ خانہ نااہلی کے خلاف اپیل پر سماعت ہوئی۔ جسٹس شمس محمود مرزا کی سربراہی میں 5 رکنی لارجر بنچ نے کیس کی سماعت کی۔

اس موقع پر سربراہ لارجر بنچ جسٹس شمس محمود مرزا نے کہا کہ یہ معاملہ اسلام آباد ہائیکورٹ میں زیرِ التوا ہے۔ جس پر عدالت نے موسم گرما کی عدالتی تعطیلات کے بعد کیس کو سماعت کے لیے مقرر کرنے کی ہدایت کر دی۔

لارجر بنچ میں جسٹس شاہد کریم، جسٹس شہرام سرور چودھری، جسٹس جواد حسن اور جسٹس رسال حسین شامل ہیں۔ جسٹس شاہد بلال حسن کی سپریم کورٹ میں نامزدگی کے بعد لارجر بنچ تحلیل ہوگیا تھا۔

خیال رہے کہ بانی پی ٹی آئی نے توشہ خانہ میں نااہلی کا اقدام لاہور ہائی کورٹ میں چیلنج کر رکھا ہے۔