برطانوی وزیراعظم کے محافظ کیخلاف تحقیقات کا آغاز

برطانوی وزیر اعظم رشی سونک کی حفاظتی ٹیم کے ایک پولیس افسر کی گرفتاری کے بعد معاملے کی تحقیقات شروع کرانے کا مطالبہ کیا جا رہا ہے۔ بھارتی نژاد رشی سونک کے مذکورہ محافظ پر الزام ہے کہ اس نے آئندہ عام انتخابات کی تاریخ پر مبینہ طور سے شرطیں لگائی تھی۔

غیر ملکی خبر رساں ایجنسی کے مطابق برطانوی پولیس نے بتایا ہے کہ گیمبلنگ کمیشن مبینہ شرط کے حوالے سے گرفتار افسر سے تحقیقات کر رہا ہے۔

پولیس نے یہ بھی بتایا کہ اس افسر کو خصوصی حفاظتی کمان کے عہدے سے معطل کر دیا گیا ہے۔پولیس افسر کو سرکاری دفتر میں خراب برتاؤ کے شک میں پیر کے روز گرفتار کر لیا گیا تھا۔ بعد ازاں تحقیقات کے انتظار میں اسے ضمانت پر رہا کر دیا گیا۔

یاد رہے کہ برطانوی وزیر اعظم رشی سونک کے معاون کے طور پر کام کرنے والے کریگ ولیمز کے حوالے سے پہلے ہی تحقیقات کی جا رہی ہیں کہ انہوں نے انتخابات کے اجرا کی تاریخ پر سٹے بازی کی ہے۔ ولیمز کنزرویٹو پارٹی کے امیدوار ہیں۔

برطانوی نشریاتی ادارے نے گذشتہ شب بتایا کہ وزیر اعظم کی کنزرویٹو پارٹی کی ہی ایک اور نامزد خاتون امیدوار لورا سونڈرز کو بھی انتخابات کی تاریخ کے حوالے سے مبینہ سٹے بازی سے متعلق تحقیقات کا سامنا ہے۔

دوسری جانب لیبر پارٹی کے سربراہ کیر اسٹارمر نے وزیر اعظم رشی سونک پر زور دیا ہے کہ وہ اس معاملے میں مبینہ طور پر ملوث افراد کی حمایت واپس لے لیں۔

یاد رہے کہ برطانیہ میں آئندہ عام انتخابات چار جولائی کو منعقد ہوں گے۔ اس مرتبہ وسیع پیمانے پر توقع کی جا رہی ہے کہ حزب اختلاف کی لیبر پارٹی انتخابات جیت کر چودہ سال سے جاری کنزرویٹو پارٹی کی حکمرانی پر روک لگا دے گی۔