دہلی :ہوائی اڈے کے ٹرمینل کی چھت گرنے سے ایک شخص ہلاک

دہلی ہوائی اڈے کے ٹرمینل کی چھت گرنے سے ایک شخص کی موت ہو گئی اور آٹھ دیگر زخمی ہو گئے۔
تفصیلات کے مطابق دیلی ہوائی اڈے کے ٹرمینل 1 کے ساتھ کھڑی گاڑیوں کی چھت کو سہارا دینے والے بڑے ستون گرنے سے چھت نیچے گر گئی۔

ایئرپورٹ حکام کا کہنا ہے کہ ٹرمینل سے تمام پروازیں تاحکم ثانی معطل کردی گئی ہیں۔

ہوائی اڈے کے ایک ترجمان نے بتایا کہ گرنے کی وجوہات کا اندازہ لگایا جا رہا ہے لیکن اس کی بنیادی وجہ گزشتہ چند گھنٹوں سے جاری موسلا دھار بارش ہے۔

عہدیداروں نے بتایا کہ اس واقعے میں چار گاڑیوں کو نقصان پہنچا اور آٹھ افراد کو معمولی چوٹیں آئیں۔

بھارت کے ایوی ایشن ریگولیٹر نے ایئرلائنز کو مشورہ دیا ہے کہ وہ مسافروں کو متبادل پروازوں میں جگہ دیں یا انہیں ریفنڈ کی پیش کش کریں۔

اس حادثے نے ہزاروں افراد کے سفری منصوبوں کو متاثر کیا ہے ، کیونکہ زیادہ تر گھریلو پروازیں ٹرمینل 1 سے اڑان بھرتی ہیں۔

کچھ ایئرلائنز نے ہوائی اڈے کے بقیہ دو ٹرمینلز پر فلائٹ آپریشن منتقل کردیا ہے۔

دہلی انٹرنیشنل ایئر پورٹ لمیٹڈ کے حکام نے کہا کہ حادثے کی وجوہات کی تحقیقات کے لئے ایک تکنیکی کمیٹی تشکیل دی گئی ہے۔