صوبائی دارالحکومت سمیت پنجاب کےمختلف شہروں میں بارش سے موسم خوشگوار

لاہور سمیت پنجاب کے مختلف شہروں میں علی الصبح بارش سے موسم خوشگوار ہو گیا۔

صوبائی دارالحکومت لاہور میں علی الصبح ہونے والے بارش کے باعث نشیبی علاقے زیر آب آگئے جس کی وجہ سے شہریوں کو مشکلات کا سامنا کرنا پڑا، بارش کے باعث کئی فیڈر ز ٹرپ کرنے سے متعدد علاقوں کی بجلی بند ہو گئی۔

لاہور کے علاقے مال روڈ، ڈیوس روڈ، گڑھی شاہو، شالیمار، باغبانپور، گلبرگ، ماڈل ٹائون، اقبال ٹائون، سمن آباد سمیت مختلف علاقوں میں تیز ہوا کے ساتھ ہونیوالے بارش سے گرمی کا زور ٹوٹ گیا۔

لاہور کے علاوہ پنجاب کے دیگر شہروں گوجرانوالہ، گجرات، مرید کے، کامونکی، شرقپور، اٹک اور حافظ آباد میں بھی خوب بارش برسی۔ بارش سے گرمی میں کمی کے باعث شہریوں کے چہرے کھل اٹھے۔