ملک کے مسائل کا حل صاف شفاف انتخاب میں ہے،بانی چیئرمین پی ٹی آئی

بانی چیئرمین پی ٹی آئی عمران خان نےکہا ہے کہ مُلک کے مسائل کا حل صاف شفاف انتخابات میں ہیں، جیل میں مرنے کے لئے تیار ہوں، جب تک زندہ ہوں لڑوں گا۔ 

اڈیالہ جیل میں صحافیوں سے غیر رسمی گفتگو کرتے ہوئے عمران خان کا کہنا تھا کہ میری ٹیم کل مجھ سے ملاقات کیلئے آئی تھی، 3 گھنٹے تک وہ اڈیالہ جیل کے باہر اور میں اندر ان کا انتظار کرتا رہا لیکن کل مجھے اپنی ٹیم سے ملاقات کی اجازت نہیں دی گئی اگر ملاقات ہوتی تو میں ان کے اختلافات ختم کروا دیتا، سپرٹینڈنٹ جیل نے میری ٹیم سے ملاقات نہیں کرائی۔

بانی چیئرمین پی ٹی آئی نےمزید کہا کہ ایس آئی ایف سی ملک ٹھیک نہیں کر سکتی،مُلک کے مسائل کا حل صاف شفاف انتخابات میں ہیں، برصغیر میں 1990 تک پاکستان سب سے آگے تھا لیکن آج سب پاکستان سے آگے ہیں اور ہمارا ملک میانمار کی طرف بڑھ رہا ہے،موجودہ بحران سے صرف وہ پارٹی مُلک کو نکال سکتی ہے جس کے ساتھ عوام ہو، ملک میں ایلیٹ کا بجٹ آگیا ہے، لوگ پٹ گئے ہیں،ملک کو صرف ایلیٹ کنٹرول کر رہی ہے۔

سابق وزیر اعظم کا کہنا تھا کہ سپرٹینڈنٹ جیل میری میٹنگ کینسل کر دیتا ہے، یہ سمجھتے ہیں کہ میری پارٹی کمزور ہوگی، انہیں پتہ ہی نہیں جس پارٹی کا ووٹ بینک ہو وہ کمزور نہیں ہوتی، اگر اس فراڈ الیکشن کی تحقیقات ہو جاتی ہیں تو چیف الیکشن کمشنر پر آرٹیکل 6 لگ جائے گا۔