وزیراعلیٰ پنجاب نے غیر قانونی ہائوسنگ سکیموں کی فہرست طلب کرلی

وزیراعلیٰ پنجاب مریم نواز نے لاہور میں غیرقانونی ہاؤسنگ سکیموں کی فہرست طلب کرلی۔

وزیراعلیٰ پنجاب مریم نواز نے ایل ڈی اے ہیڈ کوارٹرز کا دورہ کیا جہاں ڈی جی ایل ڈی اے طاہر فاروق نے ان کا استقبال کیا، وزیراعلیٰ پنجاب نے اجلاس کی صدارت بھی کی، مریم نواز ایل ڈی اے ہیڈ کوارٹرز کا دورہ کرنے والی پہلی خاتون وزیر اعلیٰ بن گئیں۔

اجلاس میں سینئر صوبائی وزیر مریم اورنگزیب، معاون خصوصی برائے سیاسی امورذیشان ملک، چیف سیکرٹری، پرنسپل سیکرٹری اور دیگر حکام بھی موجود تھے، ڈی جی ایل ڈی اے فاروق طاہر نے وزیراعلیٰ کو محکمے کی ورکنگ، جاری پراجیکٹس اور کارکردگی کے بارے بریفنگ دی۔

دوران اجلاس بریفنگ میں بتایا گیا کہ ایل ڈی اے رواں مالی سال میں گزشتہ سال کی نسبت کئی گنا زائد ریونیو اکٹھا کرے گا ،شہریوں کو رہائشی نقشوں کی منظوری کے لیے آن لائن سروس شروع کی جا رہی ہے، ریکارڈ کی جانچ پڑتال (سفٹنگ) کے نتیجے میں اربوں روپے مالیت کے سرکاری پلاٹ واگزار کرائے گئے ہیں، وزیراعلیٰ پنجاب نےایل ڈی اے حکام کو ریکارڈ کی سفٹنگ کا عمل جلد مکمل کرنے کی ہدایت کی۔

اجلاس کے دوران پنجاب ڈویلپمنٹ اتھارٹی کے قیام کا اصولی فیصلہ کیا گیا جبکہ وزیراعلیٰ نے غیر قانونی ہاؤسنگ سکیموں کی فہرست طلب کرتے ہوئے کہا کہ ہر ہاؤسنگ سکیم کا جائزہ لے کر ریگولر کرنے یا نہ کرنے فیصلہ کیا جائیگا۔

اجلاس میں ایم ایم عالم روڈ کی ری ماڈلنگ، بیوٹی فیکیشن کی منظوری دی گئی جس کے تحت لبرٹی، مین مارکیٹ، منی مارکیٹ ، حالی روڈ کے علاقے میں ٹرام چلائی جائے گی، اجلاس میں گلبرگ اور مضافاتی علاقوں کی تعمیر ومرمت اور بحالی کا بھی فیصلہ کیا گیا جس کے تحت یکساں روڈ اور ٹف ٹائلز لگائی جائیں گی۔

دوران اجلاس کریم بلاک تا موٹر وے سگنل فری کوریڈور پلان کی بھی منظوری دی گئی، کریم بلاک تا موٹر وے چھ رویہ روڈ پر دو انڈر پاسز بنیں گے، اجلاس میں لاہور کےمختلف شاہراہوں کی کمرشلائزیشن کی بھی منظوری دی گئی۔

وزیراعلیٰ مریم نواز نے مینار پاکستان اور چائنا سکیم کے سپورٹس کمپلیکس کی جلد تکمیل کی ہدایت کی جبکہ ایل ڈی اے کے لئے 46 ارب روپے ریونیو جنریشن کا ہدف بھی مقرر کیا گیا۔

اجلاس میں شہر کی مختلف اہم سڑکوں کو کمرشلائز کرنے کی تجویز کا بھی جائزہ لیا گیا، مریم نوز نے گلوبل ویلیج کا بھی دورہ کیا۔

اس موقع پر وزیراعلیٰ پنجاب مریم نواز کا کہنا تھا کہ ایل ڈی اے سٹی کی ڈویلپمنٹ پر خصوصی توجہ دی جائے۔