پاکستان نے غزہ کے مظلوم مسلمانوں کی حالت زار کو پوری دنیا کے سامنے اٹھایا ، نائب وزیر اعظم

نائب وزیراعظم اسحاق ڈار نے کہا ہے کہ پاکستان نے فلسطینی عوام کی حالت زار کو بھرپور انداز میں بین الاقوامی سطح پر اٹھایا ہے۔

آج سینیٹ میں اظہار خیال کرتے ہوئے انہوں نے غزہ میں مستقل جنگ بندی کیلئے پاکستان کے مطالبے کا اعاد ہ کیا اورزور دیا کہ عالمی عدالت انصاف میں اسرائیل کے خلاف جنگی جرائم کی تحقیقات شروع ہونی چاہئیں۔

انہوں نے کہا کہ فلسطینیوں کی نسل کشی کا خاتمہ ضرور ہونا چاہیے اورغزہ کے اندر انسانی امداد کی آزادانہ رسائی ہونی چاہیے۔

نائب وزیر اعظم نے کہاکہ پاکستان نے فلسطینی عوام کے لئے انسانی امداد کی نو کھیپ بھیجیں ہیں۔

انہوں نے مزید کہا کہ پاکستان میڈیکل اینڈ ڈینٹل کونسل نے غزہ کے میڈیکل اور ڈینٹل طالب علموں کو اپنی پڑھائی پاکستان میں مکمل کرنے کی اجازت دی ہے۔