نو منتخب برطانوی وزیر خارجہ کا غزہ میں فوری جنگ بندی کی حمایت کا اعلان

برطانیہ کے نئے وزیر خارجہ ڈیوڈ لیمی نے بطور وزیر اپنے ابتدائی بیان میں غزہ میں فوری جنگ بندی کی کوششوں کی حمایت کا اعلان کیا ہے۔ 

برطانوی لیبر پارٹی نے جمعرات کے روز انتخابات میں تاریخی کامیابی حاصل کی ہے۔ اس کے ساتھ لیبر پارٹی کے کیئر اسٹارمر کو شاہ چارلس نے وزیر اعظم نامزد کر دیا۔

لیبر پارٹی کے خارجہ امور کے نگران ڈیوڈ لیمی کو وزیر خارجہ کے طور پر ذمہ داری دی گئی، ڈیوڈ لیمی 2021 سے لیبر پارٹی کے خارجہ امور کے لیے ترجمان کے طور پر کام کرتے رہے ہیں۔

انہوں نے اپنے پہلے بیان میں ہی کہا ہے کہ ہم میں سے ہر کوئی جانتا ہے کہ وہ طبقات کس قدر اذیت سے گزر رہے ہیں جنیں اسرائیل اور غزہ سے نکلنے کا منظر نامہ دیکھنا پڑا ہے۔ لیکن اب ہماری ذمہ داری ہے کہ ہم سفارت کاری کے ذریعے غزہ میں فوری جنگ بندی کی حمایت کریں نیز یرغمالیوں کی فوری رہائی کے لیے کام کریں۔

انہوں نے مزید کہا ہے صدر جو بائیڈن کی جنگ بندی کے لیے تمام تر کوششوں کی ہر ممکن حد تک حمایت کرتے ہیں۔

واضح رہے اسرائیل کے سب سے بڑے اٹحادی ملک امریکہ کے صدر جو بائیڈن نے غزہ جنگ کے تقریبا آٹھ ماہ مکمل ہونے کے بعد غزہ میں جنگ بندی کے لیے 31 مئی کو ایک فارمولہ پیش کیا ہے۔

ڈیوڈ لیمی نے غزہ جنگ کے 9 ماہ مکمل ہونے پر برطانوی وزارت خارجہ کا قلمدان سنبھالنے کے ساتھ ہی اس جو بائیڈن فارمولے کی مکمل تائید کی ہے۔ لیبر پارٹی حکومت سے بھی توقع کی جارہی کہ وہ بھی پچھلی حکومت کی پالیسی کو ہی اسرائیل بارے جاری رکھے گی۔