لاہور :ٹرک کی ٹکر سے ریلوے ٹریک متاثر

لاہورمیں دو موریہ پل کے نیچے سے گزرنے والے کنٹینر سے متاثر ہونے والے ریلوے ٹریک کو بحال کر دیا گیا ہے۔

تفصیلات کے مطابق لاہور میں دو موریہ پل کے نیچے سے گزرنے والے کنٹینر نے ریلوے ٹریک کو ٹکر مار کر متاثر کر دیا۔

کنٹینر کی اونچائی زیادہ ہونے سے ریلوے پل کو نقصان پہنچا جس سے ریلوے ٹریک ٹیڑھا ہو گیا۔دو موریہ پل ریلوے برج کے نیچے سے گزرنےوالے کنٹینر پلر کے درمیان پھنس گیا جس سے ٹریک کو شدید نقصان پہنچا۔

ٹریک ٹیڑھا ہونے سے کراچی سے لاہور آنے والی ٹرین شالیمار ایکسپریس، راولپنڈی سے آنے والی خیبر میل کو بادامی باغ ریلوے اسٹیشن پر روک لیا گیا۔

لاہور سے راولپنڈی جانے والی ٹرین ریل کار بھی روک لی گئی۔ ٹریک بلاک ہونے سے مسافروں کو شدید مشکلات کا سامنا کرنا پڑا۔

کنٹینر ڈرائیور موقع سے فرار ہو گیا۔ ریلوے پولیس نے کنٹینر ڈرائیور کے خلاف کارروائی شروع کر دی۔ڈی ایس ریلوے لاہور محمد حنیف گل،چیف انجینئر فرید احمد اور دیگر افسر موقع پر پہنچ گے۔

ریلوے انتظامیہ موقع پر موجود ٹریک کو بحال کرانے کے لیے ریلوے لیبر اور کرین کے ذریعے ٹریک اور پلر کی مرمت کی۔ ایک طرف سے ریلوے ٹریک بحال لاہور سے راولپنڈی آنے اور جانے والی ٹرینوں کو چلا دیا گیا۔ 5 گھنٹے بعد ریلوے ٹریک کو بحال کر دیا گیا۔