ملک کے مختلف علاقوں میں آج سے تیز بارشوں کا امکان

ملک بھر کے مختلف علاقوں میں آج سے تیز بارشوں کا امکان ہے۔

محکمہ موسمیات کے مطابق آج سے بحیرہ عرب سے مون سون ہوائیں ملک میں داخل ہوں گی، جو بارشوں کا سبب بنیں گی۔

اسلام آباد، پنجاب اور کشمیر میں آج سے 11 جولائی تک تیز بارش کا امکان ہے جبکہ 11 سے 15 جولائی تک خیبر پختونخوا اور گلگت بلتستان میں بارش متوقع ہے۔

محکمہ موسمیات کے مطابق 12 سے 14 جولائی کے دوران بلوچستان اور سندھ کے اضلاع سکھر، لاڑکانہ اور جیکب آباد مین بارش ہوگی۔ملک کے بیشتر علاقوں میں موسم آج گرم رہے گا، گزشتہ روز تربت گرم ترین شہر رہا جہاں درجہ حرارت 46 ڈگری سینٹی گریڈ ریکارڈ کیا گیا۔

دوسری جانب کراچی سمیت سندھ کے مختلف علاقوں میں آج ہلکی بارش متوقع ہے۔

خیال رہے کہ گزشتہ روز کراچی کے علاقے سرجانی ٹائون میں سب سے زیادہ بارش 58 ملی میٹر ریکارڈ کی گئی تھی۔ بارش کے باعث کراچی میں کئی پروازیں منسوخ کردی گئیں جبکہ 18 پروازیں تاخیر کا شکار ہوئیں۔بارش سے شہر بھر میں ٹریفک کا نظام درہم برہم ہو گیا، اہم اور مرکزی شاہراہوں پر بارش کا پانی جمع ہونے سے شہریوں کو مشکلات کا سامنا کرنا پڑا۔