پاکستانی فاسٹ باؤلر شاہین شاہ آفریدی کے گرد گھیرا تنگ، سخت کارروائی کا امکان 

ذرائع کے مطابق آئندہ دنوں میں پاکستان کرکٹ بورڈ کی جانب سے شاہین شاہ آفریدی کے خلاف سخت ایکشن لیے جانے کا امکان ہے۔ 
پاکستانی کرکٹ ٹیم کے کوچز نے پاکستان کرکٹ بورڈ کے چیئرمین محسن نقوی کو دی جانے والی رپورٹ میں شاہین شاہ آفریدی کے تضحیک آمیز لہجے کی شکایت کی تھی۔ شاہین شاہ آفریدی نے دورہ انگلینڈ کے دوران کوچز کی بات ماننے سے انکار کر دیا تھا۔ ورلڈ کپ 2024 کے لیے امریکہ کے دورہ کے دوران بھی کوچز کو پاکستانی بالر شاہین شاہ آفریدی کے لہجے پر اعتراض تھا۔ 
ذرائع کے مطابق پی سی بی نے فیصلہ کیا ہے کہ بنگلہ دیش کے خلاف کھیلی جانے والی ہوم سیریز میں شاہین شاہ آفریدی کو شامل نہیں کیا جائے گا۔ ساتھ ہی 2 سے 3 مزید کھلاڑیوں کے خلاف بھی سخت کارروائی کا امکان ہے۔ 
بنگلہ دیش کے خلاف ہوم سیریز میں ڈومیسٹک کرکٹ کے کھلاڑیوں کو آزمائے جانے کا امکان ہے۔