ملک بھر میں انسداد ڈینگی اجلاس منعقد، ڈینگی سے بچاؤ کے اقدامات کا جائزہ

 ملک بھر میں حکومتی نمائندوں کی زیر صدارت ڈسٹرکٹ ایمرجنسی رسپانس کمیٹی برائے انسداد ڈینگی کا اجلاس منعقد ہوا، جس میں ڈینگی سے بچاؤ کے لیے مختلف اقدامات کا جائزہ لیا گیا۔ 
ذرائع کے مطابق جمعرات کو ڈپٹی کمشنر فیصل آباد نے متعلقہ محکموں کی کارکردگی کا جائزہ لیتے ہوئے کہا کہ ڈینگی لاروا کی افزائش کے لیے سازگار مقامات کا معائنہ ضروری ہے، جس کے لیے فیلڈ ٹیمیں لاروا کے مکمل خاتمے کے لیے کیمیکل ٹریٹمنٹ کریں۔
ماہرین صحت کے مطابق کیمیائی علاج میں لاپرواہی بڑی تباہی کا مؤجب بن سکتی ہے۔ مچھروں کے لاروا کا لائف سائیکل مکمل ہو نے سے لاروا مچھروں میں تبدیل ہو سکتا ہے۔ ماہرین صحت نے انسداد ڈینگی کے متعلقہ محکمے پر زور دیا کہ وہ اپنی ذمہ داریوں کا احساس کریں اور جعلی سرگرمیوں سے گریز کریں۔
حکوت کی جانب سے سختی سے خبردار کیا گیا کہ غفلت برتنے والے عملے کے خلاف سخت قانونی کارروائی شروع کی جائے گی۔
رکن پنجاب اسمبلی راجہ حنیف نے کہا کہ حکومت کی جانب سے ڈینگی کے خاتمے کے لیے کوششیں جاری ہیں۔ انہوں نے شہریوں پر زور دیا کہ وہ اپنی صفائی کا خاص خیال رکھیں، بارش کے موسم میں پانی کی مسلسل نکاسی کے مناسب انتظامات کریں۔