غزہ جنگ بندی کا وقت آچکا ،خاموش نہیں رہیں گے، امریکی نائب صدر

امر یکا کی نائب صدر کملا ہیرس نے غزہ کے حوالے سے امریکی پالیسی میں بڑی تبدیلی کا عندیہ دیتے ہوئے اور صدر جو بائیڈن کے برعکس سخت لہجہ اختیار کرتے ہوئے اسرائیلی وزیراعظم بینجمن نیتن یاہو پر زور دیا ہے کہ وہ غزہ میں جنگ بندی کے معاہدے تک پہنچنے میں مدد کریں۔

غیر ملکی خبر رساں ادارے کے مطابق اسرائیلی وزیراعظم سے ملاقات کے بعد جاری بیان میں کملا ہیرس نے کہا کہ غزہ میں جنگ کے خاتمہ کا وقت آچکاہے۔

کملا ہیرس نے غزہ میں انسانی بحران کے حوالے سے سخت لہجے میں کھُل کر بات کرتے ہوئے کہا کہ گزشتہ 9 ماہ کے دوران غزہ میں جو کچھ ہوا ہے وہ تباہ کن ہے،وہاں سے مرنے والے بچوں اور اپنی جان بچانے کے لئے بھاگتے ہوئے مایوس اور بھوکے لوگوں کی تصاویر آرہی ہیں،یہ لوگ بعض اوقات دوسری، تیسری یا چوتھی بار بے گھر ہو رہے ہیں۔

امریکی نائب صدر نے کہا کہ ہم بڑی تعداد میں لوگوں کے مصائب و آلام میں مبتلا ہونے پر خود کو بے حس ہونے کی اجازت نہیں دے سکتے اور وہ مستقبل میں اس پر خاموش نہیں رہیں گی۔

انہوں نے فلسطینی ریاست کے قیام کا بھی مطالبہ کیا اور غزہ میں جنگ بندی اور فریقین سے یرغمالیوں کی رہائی کے معاہدے پر اتفاق کرنے پر زور دیا۔

کملا ہیرس نے واضح کیا کہ وہ غزہ پر اسرائیل کی ملٹری اپروچ سے مطمئن نہیں۔ان کے اس سخت لہجہ کے باوجود تجزیہ کاروں کو توقع نہیں کہ مشرق وسطیٰ میں قریبی اتحادی اسرائیل کے بارے میں امریکی پالیسی میں کوئی بڑی تبدیلی آئے گی۔

وائٹ ہاؤس کی طرف سے جاری بیان کے مطابق نیتن یاہو کی پہلے صدر جو بائیڈن سے ملاقات ہوئی جس میں امریکی صدر نے اُن سے کہا کہ انہیں غزہ میں جنگ بندی تک پہنچنے اور امداد کی فراہمی میں حائل رکاوٹوں کو دور کرنے کی ضرورت ہے۔

یاد رہے کہ  غزہ میں اسرائیل کی فوجی کارروائیوں میں اب تک 39 ہزار سے زیادہ فلسطینی شہید ہوچکے ہیں۔ اسرائیلی فوج کی بمباری، گولہ باری اور ٹینکوں کی شیلنگ سے 80 فیصد عمارتیں تباہ اور غزہ کی لاکھوں افراد پر مشتمل تقریباً پوری آبادی بے گھر ہو چکی ہے جبکہ قحط اور ہنگامی امداد کی کمی کے باعث انسانی بحران پید اہو چکا ہے۔

امریکی حکام کا خیال ہے کہ عنقریب غزہ میں جنگ بندی ہو سکتی ہے۔ اس پس منظر میں کملا ہیرس نے کہا کہ اس حوالہ سے ایک معاہدے تک پہنچنے کے لیے بات چیت میں امید افزا پیش رفت ہوئی ہے اور میں نے اسرائیلی وزیراعظم کو بتایا ہے کہ اب وقت آ گیا ہے کہ اس معاہدے کو حتمی شکل دی جائے۔

واضح رہے کہ کملا ہیرس ممکنہ طور پر آئندہ صدارتی انتخاب میں ڈیمو کریٹک پارٹی کی امیدوار ہوں گی۔