لاہور سمیت پنجاب بھر میں طوفانی بارشیں،44سالہ ریکارڈ ٹوٹ گیا

لاہور سمیت پنجاب بھر میں موسلادھار بارشوں سے نشیبی علاقے زیر آب آگئے، بارشوں کے باعث لاہور میں رین ایمرجنسی نافذ کر دی گئی۔

صوبائی دارالحکومت میں پانی گلیوں، سڑکوں، گھروں اور ہسپتالوں میں داخل ہو گیا ہے۔ موسمیات کے مطابق لاہور ائیرپورٹ پر 44 سال کا ریکارڈ توڑتے ہوئے 337 ملی میٹر بارش ریکارڈ کی گئی ہے۔

 لاہور سمیت پنجاب بھر میں موسلا دھار بارشوں نے زندگی کو شدید متاثر کر دیا ہے۔ سروسز ہسپتال سمیت مختلف طبی مراکز میں بارش کا پانی داخل ہونے سے مریضوں اور طبی عملے کو شدید مشکلات کا سامنا ہے۔

موسلادھار بارشوں کی وجہ سے موٹروے ایم 2 اور ایم 3 پر ٹریفک معطل ہے۔ علاوہ ازیں، بارشوں کے باعث بجلی کے نظام کو بھی شدید نقصان پہنچا ہے اور لاہور میں 400 سے زائد فیڈر زٹرپ کر گئے ہیں۔

لاہور کے علاوہ شیخوپورہ، قصور، پاکپتن، سرگودھا، جہلم، مری، راولپنڈی اور اسلام آباد میں بھی نشیبی علاقے زیر آب آ گئے ہیں۔

محکمہ موسمیات نے آئندہ چند روز تک بارشوں کا سلسلہ جاری رہنے کی پیشگوئی کی ہے۔

حکام نے عوام سے احتیاط برتنے اور غیر ضروری گھر سے باہر نہ نکلنے کی اپیل کی ہے۔