ڈاکٹر شاہد صدیق کے بیٹے کا اپنے والد کے قتل کی منصوبہ بندی کرنے کا اعتراف

لاہور: لاہور پولیس کے مطابق پی ٹی آئی کے بانی رکن اور نجی اسپتال کے مالک ڈاکٹر شاہد صدیق کے بیٹے نے اپنے والد کے قتل کی منصوبہ بندی کرنے کا اعتراف کرلیا ۔ 

جوہر ٹاؤن میں اقراء میڈیکل کمپلیکس کے مالک ڈاکٹر صدیق گزشتہ ہفتے نماز جمعہ کی ادائیگی کے بعد ویلنسیا ٹاؤن میں خضرہ مسجد کے باہر کھڑے تھے کہ نامعلوم شخص نے ان کے قریب آکر فائرنگ کردی۔ بعد میں ڈاکٹر زخموں کی تاب نہ لاتے ہوئے چل بسے۔

پولیس نے چار نامعلوم حملہ آوروں کے خلاف مقدمہ درج کر کے تفتیش شروع کر دی۔ لواحقین کے بیانات، سی سی ٹی وی فوٹیج اور عینی شاہدین کے بیانات قلمبند کیے گئے۔ 

ملزم بیٹے نے اپنے والد کو قتل کرنے کے لیے چند حملہ آوروں کی خدمات حاصل کرنے کا اعتراف کیا۔

ملزم بیٹے  نے پولیس کو بتایا کہ اس کا والد اسے لڑکی سے شادی کرنے کی اجازت نہیں دے رہا تھا، اس نے مزید کہا کہ اس نے چھ ماہ قبل ڈاکٹر صدیق کو قتل کرنے کی کوشش بھی کی تھی۔