پنجاب میں آج سے 12 اگست تک مون سون بارشوں کی پیش گوئی

پنجاب میں آج 9 اگست سے 12 اگست تک مون سون بارشوں کی پیش گوئی کی گئی ہے۔

محکمہ موسمیات کے مطابق 9 اگست سے مون سون ہوائیں بحیرہ عرب اور خلیج بنگال سے ملک میں داخل ہوں گی۔ 12 اگست تک کشمیر، وادی نیلم، راولاکوٹ اور باغ میں تیز ہواؤں کے ساتھ وقفے وقفے سے بارش کا امکان ہے۔

موسم کا حال بتانے والوں کا کہنا ہے کہ 9 سے 12 اگست کے درمیان خیبرپختونخوا، بلوچستان، سندھ اور گلگت بلتستان میں بھی تیز ہواؤں اور گرج چمک کے ساتھ بارش ہوسکتی ہے۔

شدید بارشوں کے باعث مری، گلیات، مانسہرہ، کوہستان، دیر، سوات، شانگلہ، صوابی، اسلام آباد، راولپنڈی اور مشرقی پنجاب میں سیلاب کا خطرہ ہے۔

محکمہ موسمیات نے 9 سے 12 اگست کے درمیان ہونے والی بارشوں کے باعث نشیبی علاقے زیرآب آنے کا خدشہ بھی ظاہر کیا ہے۔

پراونشل ڈیزاسٹر مینجمنٹ اتھارٹی (پی ڈی ایم اے) کے ترجمان کے مطابق 10 اور 11 اگست کے دوران جنوبی پنجاب کے بیشتر اضلاع میں آندھی اور گرج چمک کے ساتھ بارش کے امکانات ہیں، لاہور، گجرانوالہ، راولپنڈی، سرگودھا، ملتان، ڈیرہ غازی خان، بہاولپور، فیصل آباد، ساہیوال اور گجرات ڈویژنز میں مون سون بارشیں متوقع ہیں۔

ڈائریکٹر جنرل (ڈی جی) پی ڈی ایم اے عرفان کاٹھیا نے بتایا کہ موسم کی صورتحال کے حوالے سے صوبے بھر کی متعلقہ انتظامیہ کو الرٹ جاری کر دیا گیا ہے۔ وزیراعلیٰ پنجاب مریم نواز کی ہدایات کے پیش نظر متعلقہ محکمے الرٹ رہیں۔ اربن فلڈنگ کے خدشے کے پیش نظر انتظامیہ چوکس رہے اور پیشگی انتظامات مکمل کرلئے۔

عرفان کاٹھیا نے مزید کہا کہ کمشنرز، ڈپٹی کمشنرز (ڈی سیز)، واٹر اینڈ سینی ٹیشن ایجنسی (واسا)، محکمہ آبپاشی، ریسکیو، سول ڈیفنس اور دیگر متعلقہ محکموں کو الرٹ رہنے کی ہدایت کی گئی ہے۔ کنٹرول روم میں 24 گھنٹے صورتحال پر نظر رکھی جا رہی ہے۔

دوسری جانب کراچی شہر میں مطلع جزوی طور پر ابر آلود ہے جس کے باعث شہر میں آج ہلکی بارش اور بوندا باندی کا امکان ظاہر کیا جارہا ہے۔محکمہ موسمیات کے مطابق آج شہر کا کم سے کم درجہ حرارت 28.4 اور زیادہ سے زیادہ 33 ڈگری سینٹی گریڈ تک جا سکتا ہے۔

 شہر میں جنوب مغربی سمت سے 14 کلومیٹر فی گھنٹہ کی رفتار سے ہوائیں چل رہی ہیں اور ہوا میں نمی کا تناسب 78 فیصد ریکارڈ کیا گیا ہے۔مون سون ہواؤں کے زیر اثر اندرون سندھ میں آج رات سے 11 اگست تک بارش کا امکان ہے، سندھ میں تیز ہواؤں اور گرج چمک کے ساتھ وقفے وقفے سے بارش کا امکان ہے۔